નવી દિલ્હી : ટીમ ઈન્ડિયાના સ્ટાર ફિનિશર અને વિસ્ફોટક બેટ્સમેન રિંકુ સિંહ પોતાની સાદગી અને રમૂજી અંદાજ માટે જાણીતા છે. તાજેતરમાં ક્વિક કોમર્સ પ્લેટફોર્મ 'ઇન્સ્ટામાર્ટ' (Instamart) સાથે સોશિયલ મીડિયા પર તેમની એક ફની ચેટ વાયરલ થઈ છે. જેમાં દેશમાં નવ-લોન્ચ થયેલા Apple iPhone 18 Pro માટે રિંકુ સિંહે ખુલ્લેઆમ ઇન્સ્ટામાર્ટ પાસે ૧-૨ મફત આઈફોનની માંગણી કરી દીધી હતી. જેના પછી નેટીઝન્સ અને ચાહકો પણ રિંકુ પાસે આઈફોન માંગવા લાગ્યા હતા.

સમગ્ર મામલો ત્યારે શરૂ થયો જ્યારે ઇન્સ્ટામાર્ટે એક પોસ્ટ શેર કરી જેમાં નવા આઈફોન ૧૮ પ્રો (બર્ગન્ડી કલર) પર રિંકુ સિંહનો ચહેરો ધરાવતું એક અનોખું બેક કવર દર્શાવવામાં આવ્યું હતું. ઇન્સ્ટામાર્ટે મજાકમાં લખ્યું કે, "જો રિંકુ સિંહ આ ટ્વીટનો જવાબ નહીં આપે, તો અમે આ iPhone કવર માર્કેટમાં લોન્ચ કરી દઈશું." આનો ત્વરિત જવાબ આપતા રિંકુ સિંહે લખ્યું, "જાવ બનાવી લો, પણ બસ બદલામાં ૧-૨ આઈફોન મને મોકલી આપજો!" રિંકુના આ મજેદાર જવાબે ફેન્સનું દિલ જીતી લીધું હતું.

"રિંકુ ભાઈ, ૧ મને પણ આપી દેજો!" - ક્રેઝ સાતમા આસમાને

રિંકુ સિંહની આ પોસ્ટ વાયરલ થતાં જ સોશિયલ મીડિયા યુઝર્સે પણ રમૂજી ટિપ્પણીઓનો વરસાદ કર્યો હતો. ઘણા યુઝર્સે લખ્યું કે, "રિંકુ ભાઈ, જો બે આઈફોન મળે તો એક મને આપી દેજો!" તો અન્ય એક યુઝરે કહ્યું કે, "એક આઈફોન અમારા તરફ પણ ટ્રાન્સફર કરી દેજો."

નોંધનીય છે કે, આ રમુજી સંવાદ એવા સમયે સામે આવ્યો છે જ્યારે સમગ્ર દેશમાં નવા લોન્ચ થયેલા iPhone 18 Pro સિરીઝનો ભારે ક્રેઝ જોવા મળી રહ્યો છે. મુંબઈ, દિલ્હી અને બેંગલુરુના એપલ સ્ટોર્સ બહાર મોડી રાતથી જ લોકોની લાંબી કતારો જોવા મળી રહી છે. આંકડા અનુસાર, આ અગાઉના iPhone 17 Pro ના મોડેલની તુલનામાં નવા iPhone 18 Pro માટે લગભગ ૧૫ થી ૨૮ ટકા વધુ માંગ જોવા મળી છે, ખાસ કરીને બર્ગન્ડી કલર વેરિઅન્ટ માટે ચાહકોમાં અસાધારણ ક્રેઝ જોવા મળી રહ્યો છે.