મુંબઈ:  બોમ્બે હાઈકોર્ટે આજે સોહરાબુદ્દીન શેખ, તેની પત્ની કૌસર બી અને સહયોગી તુલસીરામ પ્રજાપતિના કથિત ફેક એન્કાઉન્ટર કેસમાં મહત્વનો ચુકાદો આપ્યો છે. હાઈકોર્ટે આ કેસના તમામ ૨૨ આરોપીઓને નિર્દોષ જાહેર કરવાના નીચલી અદાલતના નિર્ણયને યથાવત રાખતા, પીડિત પરિવાર દ્વારા કરવામાં આવેલી અપીલોને ફગાવી દીધી છે. ચીફ જસ્ટિસ શ્રી ચંદ્રશેખર અને જસ્ટિસ ગૌતમ અંખાદની ડિવિઝન બેન્ચે જણાવ્યું હતું કે ટ્રાયલ કોર્ટનો ૨૦૧૮નો ચુકાદો યોગ્ય છે.
પીડિત ભાઈઓની દલીલો અને અદાલતનો અભિગમ:
સોહરાબુદ્દીનના ભાઈઓ રુબાબુદ્દીન અને નાયબુદ્દીને ૨૦૧૯માં હાઈકોર્ટમાં અપીલ દાખલ કરી હતી. તેમની દલીલ હતી કે ટ્રાયલ કોર્ટની સુનાવણીમાં ખામીઓ હતી અને પુરાવાઓનું ખોટું અર્થઘટન કરવામાં આવ્યું હતું. તેમણે એવી પણ ફરિયાદ કરી હતી કે સીબીઆઈ દ્વારા મહત્વના સાક્ષીઓ અને મેજિસ્ટ્રેટોને સમન્સ પાઠવવામાં આવ્યા નહોતા. જોકે, સીબીઆઈએ હાઈકોર્ટમાં સ્પષ્ટ કર્યું હતું કે તેઓ ટ્રાયલ કોર્ટના ચુકાદાને સ્વીકારે છે અને તેને પડકારવાનો કોઈ નિર્ણય લીધો નથી. હાઈકોર્ટે આ તમામ દલીલો સાંભળ્યા બાદ વર્ષ ૨૦૨૫માં ઓર્ડર અનામત રાખ્યો હતો, જેનો ચુકાદો આજે જાહેર કરવામાં આવ્યો છે.
કેસનો ઈતિહાસ અને સીબીઆઈની તપાસ:
આ કેસની શરૂઆત ૨૩ નવેમ્બર ૨૦૦૫ના રોજ થઈ હતી, જ્યારે સોહરાબુદ્દીન શેખ, કૌસર બી અને તુલસીરામ પ્રજાપતિનું હૈદરાબાદથી સાંગલી જતી લક્ઝરી બસમાંથી કથિત રીતે અપહરણ કરવામાં આવ્યું હતું. સીબીઆઈનો દાવો હતો કે સોહરાબુદ્દીન અને પ્રજાપતિને બનાવટી એન્કાઉન્ટરમાં મારી નાખવામાં આવ્યા હતા, જ્યારે કૌસર બીની હત્યા કરીને તેના મૃતદેહનો નિકાલ કરવામાં આવ્યો હતો. આ કેસમાં વર્તમાન કેન્દ્રીય મંત્રી અમિત શાહ પણ આરોપી હતા, પરંતુ ડિસેમ્બર ૨૦૧૪માં જજ એમ.બી. ગોસાવીએ તેમને આરોપમુક્ત કર્યા હતા.
૯૨ સાક્ષીઓ હોસ્ટાઈલ થતા કેસ નબળો પડ્યો:
સુપ્રીમ કોર્ટના આદેશથી ૨૦૧૨માં આ કેસ ગુજરાતથી મુંબઈ ટ્રાન્સફર કરવામાં આવ્યો હતો. ૨૧ ડિસેમ્બર ૨૦૧૮ના રોજ સ્પેશિયલ સીબીઆઈ જજ એસ.જે. શર્માએ તમામ ૨૨ આરોપીઓને નિર્દોષ જાહેર કર્યા હતા, જેમાં ગુજરાત, રાજસ્થાન અને આંધ્રપ્રદેશના નિવૃત્ત અને કાર્યરત પોલીસકર્મીઓનો સમાવેશ થતો હતો. ટ્રાયલ દરમિયાન ૨૧૦ સાક્ષીઓની તપાસ કરવામાં આવી હતી, જેમાંથી ૯૨ સાક્ષીઓ ફરી ગયા હતા. ટ્રાયલ કોર્ટે તેના ૩૫૮ પાનાના ચુકાદામાં નોંધ્યું હતું કે માત્ર શંકા કે નૈતિક આધારો પર આરોપીઓને દોષિત ઠેરવી શકાય નહીં, કારણ કે પ્રોસિક્યુશન હત્યા અને કાવતરાના આરોપો સાબિત કરવામાં નિષ્ફળ રહ્યું હતું. હવે હાઈકોર્ટે પણ આ જ તર્કને માન્ય રાખીને ચુકાદો આપ્યો છે.