​ચેન્નાઈ: તમિલનાડુના રાજકારણમાં એક બહુ મોટો ગરમાવો આવી ગયો છે. દ્રવિડિયન રાજનીતિના બે દાયકા જૂના સમીકરણો બદલાતા જોવા મળી રહ્યા છે, જેમાં મરુમલારચી દ્રવિડ મુનેત્ર કઝગમ (MDMK) પાર્ટીએ સત્તાધારી દ્રવિડ મુનેત્ર કઝગમ (DMK) સાથેનું પોતાનું નવ વર્ષ જૂનું ગઠબંધન સત્તાવાર રીતે તોડી નાખવાની જાહેરાત કરી દીધી છે. ચેન્નાઈ ખાતે શનિવારે MDMKના જનરલ સેક્રેટરી અને વરિષ્ઠ નેતા વાઈકોની અધ્યક્ષતામાં યોજાયેલી હાઈ-લેવલ જનરલ કાઉન્સિલની બેઠકમાં આ ઐતિહાસિક અને આકરો નિર્ણય લેવામાં આવ્યો હતો. આ બેઠકમાં પક્ષ દ્વારા કુલ ૨૩ પ્રસ્તાવો પસાર કરવામાં આવ્યા હતા, જેમાં DMKની આગેવાની હેઠળના ‘સેક્યુલર પ્રોગ્રેસિવ એલાયન્સ’ (SPA) માંથી તાત્કાલિક અસરથી મુક્ત થવાનો મુખ્ય પ્રસ્તાવ સામેલ હતો.

​વર્ષ ૨૦૧૭થી શરૂ થયેલા આ નવ વર્ષ લાંબા ગઠબંધનનો અંત લાવતા MDMK પક્ષે ગંભીર આક્ષેપો કર્યા છે કે, ગઠબંધનમાં રહીને પક્ષના સ્વતંત્ર રાજકીય અસ્તિત્વ અને ઓળખને નબળી પાડવાના પદ્ધતિસરના પ્રયાસો કરવામાં આવી રહ્યા હતા. તાજેતરમાં યોજાયેલી ૨૦૨૬ની તમિલનાડુ વિધાનસભા ચૂંટણી દરમિયાન પક્ષના આત્મસન્માન અને ગરિમાને ઠેસ પહોંચાડવામાં આવી હોવાનું પણ પક્ષના નેતૃત્વ દ્વારા જણાવાયું હતું. વાઈકોએ એક સભાને સંબોધતા ભાવુક થઈને જણાવ્યું હતું કે, દ્રવિડિયન ચળવળ અને ગઠબંધનને મજબૂત કરવા માટે તેઓએ નવ વર્ષ સુધી ઘણું સહન કર્યું છે અને પોતાના સ્વાભિમાન સાથે પણ બાંધછોડ કરવી પડી હતી, જેના કારણે હવે આ ગઠબંધનમાં રહેવું પક્ષના કાર્યકરો અને હોદ્દેદારો માટે શક્ય રહ્યું નથી.

​રાજકીય વિશ્લેષકોના મતે, તમિલનાડુના ચૂંટણી પરિણામો બાદ રાજ્યનું સમગ્ર રાજકીય ચિત્ર ઝડપથી બદલાયું છે. નવી ઉભરી આવેલી રાજકીય શક્તિઓ અને બદલાયેલા લોકમત બાદ અગાઉ કોંગ્રેસ, ઈન્ડિયન યુનિયન મુસ્લિમ લીગ (IUML) અને ડાબેરી પક્ષો સહિતના અન્ય સહયોગીઓએ પણ DMKનો સાથ છોડી દીધો છે, ત્યારે હવે MDMKનું આ ગઠબંધનમાંથી બહાર નીકળવું એ DMK માટે મોટો ફટકો માનવામાં આવી રહ્યો છે. જોકે, ભવિષ્યની રણનીતિ અંગે પ્રસ્તાવમાં સ્પષ્ટતા કરવામાં આવી છે કે MDMK આગામી ચૂંટણીઓ સમયે યોગ્ય સમયે જ નવા ચૂંટણી ગઠબંધન અંગેનો અંતિમ નિર્ણય લેશે અને હાલમાં પક્ષ સંગઠનને મજબૂત કરવા પર ધ્યાન કેન્દ્રિત કરશે.