​શ્રીનગર : જમ્મુ-કાશ્મીરમાં શાંતિ અને સુરક્ષાને ડહોળવાનો પ્રયાસ કરી રહેલા આતંકવાદીઓ સામે ભારતીય સુરક્ષાબળોએ લાલ આંખ કરી છે. કાશ્મીર ઘાટીના બડગામ જિલ્લામાં આવેલા ગીચ જંગલ વિસ્તારમાં સેના દ્વારા ચલાવવામાં આવેલા અત્યંત ગુપ્ત અને ચોક્કસ આયોજનબદ્ધ ‘ઓપરેશન કોરાગ’ (Operation Korag) અંતર્ગત મંગળવારે મોડી રાત્રે સેના અને આતંકીઓ વચ્ચે ભીષણ મુઠભેડ સર્જાઈ હતી. આ સામસામે ગોળીબારમાં પહલગામમાં થયેલા ભયાનક આતંકવાદી હુમલામાં મુખ્ય ભૂમિકા ભજવનાર કુખ્યાત આતંકવાદી મોહમ્મદ આસિફ ઉર્ફે હાશિમ મૂસા સ્થળ પર જ માર્યો ગયો છે. સેનાએ સમગ્ર વિસ્તારને ઘેરી લઈને સર્ચ ઓપરેશન વધુ સઘન બનાવ્યું છે.

​મળતી વિગતો મુજબ, બડગામના જંગલ વિસ્તારમાં સશસ્ત્ર આતંકવાદીઓની છૂપાવાની ચોક્કસ બાતમી મળતા જ ભારતીય સેના, સ્થાનિક પોલીસ અને સીઆરપીએફની સંયુક્ત ટુકડીઓએ સમગ્ર વિસ્તારને સીલ કરી દીધો હતો. સુરક્ષાબળો નજીક પહોંચતા જ છુપાયેલા આતંકીઓએ અંધાધૂંધ ગોળીબાર શરૂ કરી દીધો હતો, જેના જવાબમાં સેનાએ પણ વળતો પ્રહાર કર્યો હતો. કલાકો સુધી ચાલેલી આ અથડામણમાં પહલગામ હુમલાનો મુખ્ય સૂત્રધાર આસિફ માર્યો ગયો હતો.

​તપાસમાં સિક્રેટ એજન્સીઓ દ્વારા અત્યંત ચોંકાવનારો ખુલાસો થયો છે કે માર્યો ગયેલો આતંકવાદી મોહમ્મદ આસિફ ઉર્ફે મૂસા ભૂતકાળમાં પાકિસ્તાની સેના (Pakistani Army) માં ફરજ બજાવી ચૂક્યો હતો. પાકિસ્તાની સૈન્યમાં તાલીમ મેળવ્યા બાદ તે આતંકવાદી સંગઠનમાં જોડાયો હતો અને ઘાટીમાં અનેક હિંસક તથા કાયરતાપૂર્ણ આતંકી ઘટનાઓને અંજામ આપવામાં સક્રિય રહ્યો હતો. પહલગામ હુમલા બાદથી તે સુરક્ષાબળોની હિટલિસ્ટમાં ટોપ પર હતો. સેના દ્વારા ‘ઓપરેશન કોરાગ’ હેઠળ આતંકવાદ સામે મેળવવામાં આવેલી આ સફળતાને ઘાટીમાં સક્રિય આતંકી નેટવર્ક માટે બહુ મોટો આંચકો માનવામાં આવી રહ્યો છે.