નવી દિલ્હી : વિયેતનામના ફુ ક્વોક ટાપુ પાસે પ્રવાસીઓથી ભરેલી એક સ્પીડબોટ અચાનક વાવાઝોડામાં ફસાઈ જતા પલટી ગઈ હતી, જેમાં ૧૫ ભારતીય પ્રવાસીઓના કરૂણ મોત નિપજ્યા છે. આ બોટમાં ૩૨ ભારતીયો સહિત કુલ ૩૬ લોકો સવાર હતા. અકસ્માતમાંથી બચી ગયેલા નિર્મલ કુમારે જણાવ્યું હતું કે, કોઈ પણ ચેતવણી વિના આવેલા તોફાનને કારણે સેકન્ડોમાં બોટ ઊંધી થઈ ગઈ હતી, જેના કારણે અંદર બેઠેલા મુસાફરો ફસાઈ ગયા હતા.
"જ્યારે અમે એક ટાપુથી બીજા ટાપુ પર જઈ રહ્યા હતા, ત્યારે અચાનક તોફાન આવ્યું... અચાનક એક સેકન્ડમાં, બોટ ઊંધી થઈ રહી હતી. અમે આગળના ભાગમાં હતા અને દરિયામાં કૂદીને બહાર આવ્યા. જે લોકો અંદર હતા તેઓ ફસાઈ ગયા, અને બોટ ઊંધી હોવાથી, તેઓ હોડીની બહાર આવી શક્યા નહીં. અમે બોટમાં બત્રીસ લોકો હતા, પરંતુ કુલ મળીને, અમારી પાસે એકસો પાંચ લોકો હતા," તેમણે કહ્યું.
બચાવ ટીમોએ તાત્કાલિક કાર્યવાહી કરી હોવા છતાં, નિર્મલ કુમારે ગંભીર આક્ષેપ કર્યો છે કે નજીકના ટાપુ પર પૂરતી તબીબી સુવિધાઓ અને પુરવઠાનો અભાવ હતો, જેના કારણે સમયસર સારવાર ન મળતા અન્ય જીવ પણ જોખમમાં મુકાયા હતા. વિયેતનામના સ્થાનિક અધિકારીઓ દ્વારા હાલ આ સમગ્ર દુર્ઘટનાના ચોક્કસ કારણોની ઝીણવટભરી તપાસ હાથ ધરવામાં આવી રહી છે.
આ ઘટના બાદ હવે પ્રવાસીઓની સુરક્ષા અને દરિયાઈ મુસાફરીના નિયમોને લઈને ગંભીર પ્રશ્નો ઉભા થયા છે. આગામી દિવસોમાં વિયેતનામ સરકાર દ્વારા તપાસ રિપોર્ટના આધારે કાર્યવાહી કરવામાં આવશે, જ્યારે મૃતકોના પરિવારોને વળતર અને મૃતદેહોને ભારત લાવવાની પ્રક્રિયા માટે રાજદ્વારી સ્તરે પ્રયાસો શરૂ કરી દેવામાં આવ્યા છે. આ હોનારતે પ્રવાસીઓ માટે દરિયાઈ મુસાફરીમાં હવામાનની આગાહી કેટલી મહત્વની છે, તે સાબિત કરી દીધું છે.