તેહરાન:   મધ્ય-પૂર્વ  માં ચાલી રહેલા ભીષણ સૈન્ય સંઘર્ષ વચ્ચે વૈશ્વિક રાજકારણમાં મોટો રાજદ્વારી ગરમાવો આવી ગયો છે. અમેરિકી રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ' પર મોટા અક્ષરોમાં સત્તાવાર જાહેરાત કરી છે કે, ઈરાનની વિનંતી બાદ ૩૦ જૂને કતારની રાજધાની દોહામાં બંને દેશો વચ્ચે એક મહત્ત્વપૂર્ણ બેઠક યોજાવા જઈ રહી છે. જોકે, ઈરાનના નાયબ વિદેશ પ્રધાન કાઝેમ ઘરીબાદીએ ટ્રમ્પના આ દાવાને સ્પષ્ટપણે નકારી કાઢતાં જણાવ્યું છે કે અમેરિકી અધિકારીઓ સાથે આવી કોઈ બેઠક સુનિશ્ચિત કરવામાં આવી નથી. હોર્મુઝની ખાડીમાં થયેલા તાજેતરના હુમલા બાદ ઈરાન અમેરિકા સાથે કોઈપણ પ્રકારની વાટાઘાટોનો સખત વિરોધ કરી રહ્યું છે, જેના કારણે વૈશ્વિક બજારમાં ક્રૂડ ઓઈલના ભાવ આકાશે આંબી રહ્યા છે.

આ રાજદ્વારી ગજગ્રાહ વચ્ચે પાયાની સ્થિતિ વધુ વણસી રહી છે, કારણ કે વાટાઘાટોના અહેવાલોની સમાંતરે જ ઈરાન દ્વારા બહેરીન અને કુવૈતમાં આવેલા યુએસ લશ્કરી થાણાઓ પર મિસાઈલ હુમલા કરાયા હોવાના અહેવાલો સામે આવ્યા છે. રાષ્ટ્રપતિ ટ્રમ્પે આક્રમક વલણ અપનાવતા કહ્યું છે કે અમેરિકા લશ્કરી રીતે આ ઓપરેશન પૂર્ણ કરવા સક્ષમ છે અને તેમણે તેલના વધતા ભાવો માટે સીધું તેહરાનને જવાબદાર ઠેરવ્યું છે. માત્ર એક અઠવાડિયા પહેલા જ સ્વિટ્ઝર્લૅન્ડમાં યુએસ ઉપરાષ્ટ્રપતિ જે.ડી. વાન્સ અને ઈરાની સ્પીકર મોહમ્મદ બાકર કાલિબાફ વચ્ચે થયેલી ઉચ્ચ સ્તરીય બેઠક બાદ પ્રતિબંધો હટાવવાની પ્રક્રિયા શરૂ થઈ હતી, પરંતુ હવે બંને પક્ષોએ એકબીજા પર કામચલાઉ યુદ્ધવિરામ)ના ઉલ્લંઘનનો આરોપ લગાવી ફરીથી મોરચો ખોલી દીધો છે.

બીજી તરફ, આ સળગતી આગમાં ઘી હોમતા હોય તેમ ઇઝરાયેલે પણ સત્તાવાર પુષ્ટિ કરી છે કે તેણે દક્ષિણ લેબનોનમાં સક્રિય આતંકી સંગઠન હિઝબુલ્લાહના ઠેકાણાઓ પર ફરીથી હવાઈ હુમલા શરૂ કરી દીધા છે. અમેરિકન સત્તાવાર ન્યૂઝ એજન્સીઓ અગાઉ દાવો કરી રહી હતી કે બંને પક્ષો હુમલા રોકવા અને વાટાઘાટોની ટેબલ પર આવવા સંમત થયા છે, પરંતુ જમીની હકીકત તદ્દન વિપરીત દેખાઈ રહી છે. ૩૦ જૂનની આ પ્રસ્તાવિત દોહા બેઠક પર સર્જાયેલા સસ્પેન્સ અને તેહરાનના કડક ઈનકાર બાદ હવે સમગ્ર વિશ્વની નજર એ વાત પર ટકેલી છે કે મધ્ય-પૂર્વનું આ યુદ્ધ વિરામ તરફ આગળ વધશે કે પછી વધુ ભયાનક વૈશ્વિક આર્થિક અને સૈન્ય સંકટમાં પરિણમશે.