નવી દિલ્હી, તા.૦૫: ભારત સરકાર દ્વારા દેશની વિઝા પ્રણાલીને વધુ સરળ, પારદર્શક અને વૈશ્વિક ધોરણોને અનુરૂપ બનાવવા માટે એક મોટો અને મહત્વપૂર્ણ નિર્ણય લેવામાં આવ્યો છે. કેન્દ્રીય ગૃહ મંત્રાલય દ્વારા આગામી સમયમાં વિઝા શ્રેણીઓની સંખ્યા ૧૩ થી ઘટાડીને ૯ કરવામાં આવશે, તેમજ વિઝા અરજી ફોર્મમાં ભરવાની વિગતો એટલે કે ફિલ્ડ્સમાં સીધો ૭૦ ટકા સુધીનો ઘટાડો કરવાની યોજના ઘડવામાં આવી છે. આ ફેરફારોથી વિદેશી નાગરિકો માટે ભારતની મુલાકાતે આવવાની પ્રક્રિયા અત્યંત સુગમ બનશે તેવી અપેક્ષા છે.

પ્રાપ્ત વિગતો અનુસાર, આ પ્રસ્તાવિત ફેરફારો 'વિઝા મેન્યુઅલ, ૨૦૧૯' ની ઉચ્ચ-સ્તરીય સમીક્ષા બાદ સામે આવ્યા છે. આ કવાયતનો મુખ્ય ઉદ્દેશ્ય જૂની અને અપ્રચલિત પ્રક્રિયાઓને નાબૂદ કરવાનો, વારંવાર પુનરાવર્તિત થતી માહિતીને દૂર કરવાનો અને સમગ્ર અરજી પ્રક્રિયાને યુઝર-ફ્રેન્ડલી બનાવવાનો છે. સરકાર દ્વારા મુખ્ય વિઝા શ્રેણીઓ ઘટાડવાની સાથેસાથે તેની પેટા-શ્રેણીઓની સંખ્યા પણ ૪૯ થી ઘટાડીને ૨૩ કરવાની યોજના છે, જેના માટે અનેક વર્ગીકરણોને એકીકૃત કરવામાં આવશે.

વિઝા અરજી ફોર્મમાં કરવામાં આવનાર ફેરફારો વિશે વાત કરીએ તો, અરજદારોએ હવે લાંબા અને જટિલ પ્રશ્નોના જવાબો આપવા પડશે નહીં. ફોર્મમાંથી એવી પ્રશ્નાવલીઓ અને વિગતોને દૂર કરવામાં આવશે જે એકબીજા સાથે ઓવરલેપ થતી હોય કે બિનજરૂરી હોય. આનાથી માત્ર અરજદારોનો સમય જ નહીં બચે, પરંતુ વિઝા અરજીઓ પર કામ કરતા અધિકારીઓ દ્વારા થતી ભૂલોની શક્યતા પણ નહિવત થઈ જશે.

જો કે, સરકારે સ્પષ્ટ કર્યું છે કે અરજી ફોર્મની વિગતોમાં ઘટાડો કરવાાથી સુરક્ષા તપાસ કે બેકગ્રાઉન્ડ વેરિફિકેશનની આવશ્યકતાઓમાં કોઈ બાંધછોડ કરવામાં આવશે નહીં. રાષ્ટ્રીય સુરક્ષા માટે જરૂરી તમામ માહિતી અને પૃષ્ઠભૂમિ ચકાસણીની પ્રક્રિયા અગાઉની જેમ જ કડક અને યથાવત જાળવી રાખવામાં આવશે, જેથી દેશની સુરક્ષા સામે કોઈ જોખમ ઊભું ન થાય.

આ સમગ્ર ફેરફારો ઓગસ્ટ માસમાં યોજાયેલી ઉચ્ચ-સ્તરીય સમીક્ષા બેઠક બાદ ઔપચારિક બનાવવામાં આવ્યા છે. વિઝા મેન્યુઅલ ૨૦૧૯ ના વિવિધ પ્રકરણોમાં વ્યાપક સુધારા રજૂ કરીને તમામ શ્રેણીઓમાં સમાનરૂપે માર્ગદર્શિકા લાગુ કરવામાં આવશે. સત્તાવાળાઓ માટે પણ ઓવરલેપિંગ વર્ગીકરણો એકીકૃત થવાથી આંતરરાષ્ટ્રીય પ્રવાસીઓનું સંચાલન વધુ સરળ બનશે.

હાલમાં આ સુધારેલા માળખાનો અંતિમ અમલ કરવાનો બાકી છે, અને વ્યક્તિગત વિઝા શ્રેણીઓ પર આ નિયમો કઈ રીતે લાગુ થશે તેની વિગતવાર માર્ગદર્શિકા ટૂંક સમયમાં જાહેર કરવામાં આવશે. આ પગલાથી વૈશ્વિક સ્તરે ભારત આવતા પ્રવાસીઓ અને વ્યાવસાયિકોમાં ભારે ઉત્સાહ જોવા મળી રહ્યો છે અને ભારતનું ટૂરિઝમ તથા બિઝનેસ સેક્ટર વધુ મજબૂત બનશે.