નવી દિલ્હી : દેશના અતિ મહત્વના વીઆઇપી અને પદધારીઓની સુરક્ષામાં તૈનાત નેશનલ સિક્યુરિટી ગાર્ડ (NSG)ના બ્લેક કેટ કમાન્ડોના આઇકોનિક કાળા યુનિફોર્મમાં હવે મોટો બદલાવ થવા જઈ રહ્યો છે. કમાન્ડોને તીવ્ર ગરમી અને પ્રતિકૂળ હવામાનમાં ફરજ બજાવવામાં પડતી ભારે મુશ્કેલીઓને ધ્યાનમાં રાખીને વીઆઇપી સિક્યુરિટી સ્ક્વોડ માટે નવો સુવિધાયુક્ત ગણવેશ રજૂ કરવાની તૈયારીઓ હાથ ધરાઈ છે. નવા યુનિફોર્મ ખાસ નાયકો ફેબ્રિકમાંથી તૈયાર કરવામાં આવશે, જેમાં નાયલોન અને કોટનનું મિશ્રણ વાપરવામાં આવ્યું છે. આ અદ્યતન કાપડમાંથી હવા સરળતાથી પસાર થઈ શકે છે અને તે શરીરમાંથી પરસેવાનો ભેજ તુરંત શોષી લે છે, જેથી તીવ્ર તાપમાનમાં પણ કમાન્ડોની કાર્યક્ષમતા જળવાઈ રહે.

આ મહત્ત્વપૂર્ણ ફેરફાર પાછળ એપ્રિલ ૨૦૨૬માં બનેલી એક ગંભીર ઘટના જવાબદાર છે, જ્યારે આંધ્રપ્રદેશના મુખ્યમંત્રી ચંદ્રબાબુ નાયડુની સુરક્ષામાં તૈનાત એક એનએસજી કમાન્ડો વિજયવાડામાં ફરજ દરમિયાન અચાનક બેભાન થઈને ઢળી પડ્યા હતા. તે દિવસે વિજયવાડામાં તાપમાન લગભગ ૪૪ ડિગ્રી સેલ્સિયસ જેટલું આકરૂં હતું અને કમાન્ડો ભારે રક્ષણાત્મક જેકેટ અને કાળો ગણવેશ પહેરીને સ્ટેન્ડબાય હતા. આ ઘટના બાદ એનએસજીના ઉચ્ચ અધિકારીઓએ તાત્કાલિક ધોરણે કમાન્ડોના વર્તમાન યુનિફોર્મ તેમજ ગરમીમાં પડતી શારીરિક સમસ્યાઓની ગંભીર સમીક્ષા હાથ ધરી હતી અને નવો એર-કૂલ્ડ ગણવેશ લાવવાનો નિર્ણય કર્યો હતો.

ઉલ્લેખનીય છે કે એનએસજીના આ જાંબાઝ કમાન્ડો માત્ર વડા પ્રધાન જ નહીં પરંતુ દેશની નવ અન્ય અતિ મહત્વપૂર્ણ હસ્તીઓની કડક સુરક્ષા વ્યવસ્થાની જવાબદારી સંભાળે છે. અગાઉ પણ વિષમ ભૌગોલિક અને કટોકટીપૂર્ણ સ્થિતિઓમાં કમાન્ડોના ઓપરેશનલ ગિયર અને આર્મર સિસ્ટમમાં સમયઅંતરે સુધારા કરવામાં આવ્યા છે. વિજયવાડાની ઘટનાએ સુરક્ષા દળોના ગણવેશ અને તેમની શારીરિક અનુકૂળતા અંગે ગંભીર પ્રશ્નો ખડા કર્યા હતા, જેના પગલે કમાન્ડોનું સ્વાસ્થ્ય અને સુરક્ષા જળવાઈ રહે તે હેતુથી આ મોટો નીતિગત નિર્ણય લેવાયો છે.

નવા નાયકો ફેબ્રિક વાળા યુનિફોર્મની ડિઝાઇન અને ટ્રાયલ પ્રક્રિયા પૂર્ણ થયા બાદ ટૂંક સમયમાં જ તમામ તૈનાત કમાન્ડોને આ નવો ગણવેશ સોંપવામાં આવશે. એનએસજી તંત્ર દ્વારા આગામી સમયમાં વીઆઇપી સુરક્ષા અને કાઉન્ટર-ટેરર ઓપરેશન્સમાં તૈનાત જવાનો માટે વધુ હળવા વજનના બુલેટપ્રૂફ જેકેટ અને સુધારેલા હેલ્મેટ પણ પૂરા પાડવાનું આયોજન છે. આ પગલાંથી કમાન્ડોની ઓપરેશનલ સજ્જતા વધુ મજબૂત બનશે અને તેઓ કોઈ પણ ભૌગોલિક કે હવામાનની વિષમતા વચ્ચે પણ પોતાની ફરજ સફળતાપૂર્વક બજાવી શકશે.