નવી દિલ્હી : ભારત સરકારના 'આત્મનિર્ભર ભારત' અભિયાન હેઠળ ભારતીય વાયુસેના (IAF) ની ફાયરપાવર અને આક્રમક ક્ષમતાઓને મજબૂત કરવા માટે એક મોટો ઐતિહાસિક નિર્ણય લેવામાં આવ્યો છે. સંરક્ષણ મંત્રાલયે ભારતીય વાયુસેના માટે ૧૬૦ 'સેટેલાઇટ સ્માર્ટ એન્ટી-એરફિલ્ડ વેપન્સ' (SAT-SAAW) અને તેના સંબંધિત સાધનોની ખરીદી માટે 'ભારત ડાયનેમિક્સ લિમિટેડ' (BDL) સાથે ₹૮૧૦.૭૯ કરોડના કરાર પર હસ્તાક્ષર કર્યા છે.

શું છે SAAW અને શા માટે તે આટલું ઘાતક છે?

સંરક્ષણ સચિવ રાજેશ કુમાર સિંહની હાજરીમાં થયેલા આ કરાર હેઠળ ખરીદવામાં આવનાર SAAW એ હવામાંથી જમીન પર ચોક્કસ પ્રહાર કરતું સ્વદેશી ગાઈડેડ ગ્લાઈડ બોમ્બ (Precision-Guided Glide Bomb) છે.

• DRDO દ્વારા નિર્મિત: આ શસ્ત્ર પ્રણાલીને DRDO દ્વારા સ્વદેશી રીતે ડિઝાઈન અને વિકસિત કરવામાં આવી છે, જેમાં ૬૦ ટકાથી વધુ સ્થાનિક સામગ્રીનો ઉપયોગ કરાયો છે.

• ફાઈટર જેટ્સથી લોન્ચિંગ: આ બોમ્બને ભારતીય વાયુસેનાના જગુઆર (Jaguar), હોક (Hawk) અને સુખોઈ-30 MKI (Su-30 MKI) જેવા ઘાતક ફાઈટર વિમાનોમાંથી સહેલાઈથી છોડી શકાશે.

• સેટેલાઇટ નેવિગેશન સિસ્ટમ: સેટેલાઇટ ગાઇડન્સ ધરાવતું આ શસ્ત્ર દુશ્મનના રનવે, ટેક્સી ટ્રેક, હેંગર્સ, મજબૂત બંકરો, રડાર સ્ટેશનો અને ઈંધણ ડેપો પર મિલીમીટરની ચોકસાઈ સાથે પ્રહાર કરી શકે છે.

દુશ્મનની એર ડિફેન્સ રેન્જની બહારથી જ થશે નાશ

આ સ્માર્ટ શસ્ત્રની સૌથી મોટી વિશેષતા એ છે કે તે ફાઈટર જેટ્સને દુશ્મનની 'સરફેસ-ટુ-એર મિસાઈલ' (SAM) ની રેન્જમાં પ્રવેશ્યા વિના, ઘણે દૂરથી જ (Stand-off range) દુશ્મનના પ્રદેશમાં ઉંડે સુધી હુમલો કરવાની ક્ષમતા આપે છે. પ્રોપલ્શન માટે મોંઘા રોકેટ મોટરને બદલે આ ગ્લાઇડ બોમ્બ એરોડાયનેમિક્સનો ઉપયોગ કરતો હોવાથી તે પરંપરાગત મિસાઈલો કરતાં ઘણો સસ્તો પણ છે.

આ શસ્ત્રોની ડિલિવરી ૨૦૨૭ થી ૨૦૨૯ વચ્ચે પૂર્ણ થવાની ધારણા છે, જેનાથી યુદ્ધના પ્રારંભિક તબક્કામાં જ વિરોધી દેશના એરફિલ્ડ્સને સંપૂર્ણપણે ઠપ્પ કરવાની વાયુસેનાની ક્ષમતા અનેક ગણી વધી જશે.