મુંબઈ : મુંબઈના મસ્જિદ બંદર વિસ્તારમાંથી એક ચોંકાવનારા અને ભયાનક અકસ્માતના સમાચાર સામે આવ્યા છે. અહીં વિઠ્ઠલદાસ ચંદન સ્ટ્રીટ પર આવેલી મ્હાડા (MHADA) ની સેસ પ્રાપ્ત 'લોખંડવાલા બિલ્ડિંગ'ના છઠ્ઠા માળનો સ્લેબ અચાનક ધડાકાભેર નીચેના પાંચમા માળે તૂટી પડ્યો હતો. શનિવારે બપોરે અંદાજે ૧૨.૩૪ વાગ્યે બનેલી આ ઘટનાને પગલે સમગ્ર ઈમારતમાં ભારે અફરાતફરી અને અફડાતફડીનો માહોલ સર્જાયો હતો.

ઘટના સમયે ઈમારતના અસરગ્રસ્ત ભાગમાં ૬ રહેવાસીઓ ફસાયેલા હતા. દુર્ઘટનાની જાણ થતાં જ મુંબઈ ફાયર બ્રિગેડ અને ડિઝાસ્ટર મેનેજમેન્ટની ટીમ તાત્કાલિક ઘટનાસ્થળે દોડી આવી હતી. બચાવ ટુકડીએ સરાહનીય કામગીરી કરતા ફસાયેલા તમામ ૬ લોકોને સુરક્ષિત રીતે બહાર કાઢ્યા હતા. જોકે, આ સ્લેબ ધરાશાયી થવાના કારણે બે લોકો ગંભીર રીતે ઘાયલ થયા છે.

તબીબી સૂત્રોના જણાવ્યા અનુસાર, ઈજાગ્રસ્તોની ઓળખ ૩૫ વર્ષીય બિલાલ શેખ અને ૫૫ વર્ષીય જમશેદ શેખ તરીકે થઈ છે. બંને ઘાયલોને તાત્કાલિક ધોરણે નજીકની ખાનગી હોસ્પિટલમાં સારવાર અર્થે ખસેડવામાં આવ્યા છે. આ લોખંડવાલા બિલ્ડિંગ મ્હાડા હેઠળ સેસ પ્રાપ્ત મિલકત હોવાથી જૂની અને જર્જરિત હોવાનું કહેવાય છે. ઘટના બાદ સુરક્ષાના ભાગરૂપે ઈમારતના અસરગ્રસ્ત હિસ્સાને ખાલી કરાવીને તપાસ હાથ ધરવામાં આવી છે.