મુંબઈ તા.૧૫:મુંબઈના બાંદ્રા-કુર્લા કોમ્પ્લેક્સ (BKC) ખાતે ડાયમંડ માર્કેટ નજીક મેટ્રો લાઈન-2Bના કામ દરમિયાન શુક્રવારે વહેલી સવારે મોટી દુર્ઘટના સર્જાઈ હતી. MTNL જંક્શન પાસે અંડર-કન્સ્ટ્રક્શન ફ્લાયઓવરનું સ્ટીલનું ગર્ડર બીમ લગાવતી વખતે ક્રેન પલટી જતાં 14 શ્રમિકો ઘાયલ થયા હતા. ઘટનાને પગલે વિસ્તારમાં ભારે અફરાતફરી મચી ગઈ હતી અને ટ્રાફિક જામના દૃશ્યો સર્જાયા હતા.

મળતી માહિતી મુજબ આ દુર્ઘટના વહેલી સવારે 4:41 વાગ્યે બની હતી. સાંતાક્રુઝ-ચેમ્બુર લિંક રોડ (SCLR) એક્સટેન્શન પ્રોજેક્ટ હેઠળ BKCને જોડતા ફ્લાયઓવરનું કામ ચાલી રહ્યું હતું. 21થી 49 વર્ષની વયજૂથના શ્રમિકો ગર્ડર પર કોન્ક્રીટ રેડવાનું કામ કરી રહ્યા હતા ત્યારે અચાનક ગર્ડર તૂટી પડ્યું હતું. પ્રાથમિક તપાસમાં સામે આવ્યું છે કે બેરિંગમાં ખામી સર્જાતાં સ્ટીલનો 65 મીટર લાંબો અને 250 મેટ્રિક ટન વજનનો સ્પાન નીચે પડ્યો હતો.

દુર્ઘટનાની જાણ થતાં જ પોલીસ, ફાયર બ્રિગેડ અને MMRDAના અધિકારીઓ ઘટનાસ્થળે દોડી આવ્યા હતા. તમામ 14 ઘાયલ શ્રમિકોને વિલે પાર્લે સ્થિત વી.એન. દેસાઈ હોસ્પિટલમાં ખસેડવામાં આવ્યા હતા. સદનસીબે કોઈ જાનહાનિ થઈ નથી અને તમામ શ્રમિકોની હાલત સ્થિર હોવાનું ડોક્ટરોએ જણાવ્યું હતું.

MMRDA દ્વારા આ ₹415 કરોડના ખર્ચે બનતા 3.8 કિલોમીટર લાંબા ફ્લાયઓવરનું નિર્માણ કરવામાં આવી રહ્યું છે. આ ફ્લાયઓવરથી LBS માર્ગથી વેસ્ટર્ન એક્સપ્રેસ હાઈવે સુધીની કનેક્ટિવિટી વધશે અને BKC વિસ્તારમાં ટ્રાફિકનું ભારણ ઘટશે. પ્રોજેક્ટનું 65% કામ પૂર્ણ થઈ ચૂક્યું છે.

ઘટના બાદ પર્યાવરણ મંત્રી આદિત્ય ઠાકરેએ ટ્વિટ કરીને જણાવ્યું કે MMRDA દ્વારા 15 દિવસની તપાસના આદેશ આપવામાં આવ્યા છે. બેદરકારી માટે જવાબદારોને છોડવામાં નહીં આવે. IIT અને VJTIના નિષ્ણાતોની ત્રણ સભ્યોની કમિટી બનાવવામાં આવી છે. કોન્ટ્રાક્ટર જે. કુમાર ઇન્ફ્રા પ્રોજેક્ટ્સ લિમિટેડની કામગીરીની પણ તપાસ થશે.

દુર્ઘટનાને કારણે BKCના MTNL જંક્શન આસપાસનો ટ્રાફિક કલાકો સુધી ખોરવાયો હતો. ઓફિસ જતા લોકોને ભારે હાલાકીનો સામનો કરવો પડ્યો હતો. ક્રેન અને પડેલા ગર્ડરને હટાવવાની કામગીરી યુદ્ધના ધોરણે શરૂ કરવામાં આવી હતી.