મેરઠ, તા.28: ઉત્તર પ્રદેશના મેરઠ શહેરની પોશ ડિફેન્સ કોલોનીમાં રહેતા જાણીતા રમતગમત ઉદ્યોગપતિ આશુતોષ ભલ્લાના ઘરેથી કરોડો રૂપિયાના હીરા-સોનાના ઘરેણાં અને રોકડ રકમની સનસનાટીભરી ચોરી કરનાર પશ્ચિમ બંગાળની મૂળ નિવાસી નોકરાણી રોશની અને તેના બોયફ્રેન્ડ નીરજની કાનપુર ખાતેથી ધરપકડ કરવામાં આવી છે. આશુતોષ ભલ્લાની માતા રેખા ભલ્લાની ચામાં અતિશય માત્રામાં ઊંઘની ગોળીઓ ભેળવીને તિજોરી સાફ કરનાર આ નોકરાણી ઘટના બાદ બસ પકડીને કાનપુર ભાગી છૂટી હતી, પરંતુ પોલીસે ટેકનિકલ સર્વેલન્સ અને સીસીટીવી સ્કેનિંગના આધારે બંને આરોપીઓને ઝડપી લીધા છે.

પ્રાપ્ત વિગતો અનુસાર, આ આયોજિત ગુનો સોમવારે બપોરે આચરવામાં આવ્યો હતો જ્યારે ઘરના અન્ય સ્ટાફની નજર ચૂકવીને રોશનીએ માતા રેખા ભલ્લા માટે ચા બનાવી હતી અને તેમાં ૫ થી ૭ ઊંઘની ગોળીઓ પીસીને ભેળવી દીધી હતી. વૃદ્ધા બેભાન થઈ જતાં જ તેણે તિજોરીમાંથી કરોડો રૂપિયાનો સામાન સરકાવી લીધો હતો અને પાછળના દરવાજેથી બહાર નીકળીને લોકલ ટેમ્પોમાં બેગમપુલ પહોંચી હતી, જ્યાંથી તે કાનપુર જતી રોડવેઝ બસમાં સવાર થઈ ગઈ હતી.

ચોરીની જાણ થતાં જ ઘટનાસ્થળે પહોંચેલી સ્થાનિક પોલીસે તપાસના ભાગરૂપે ઘરના રસોઈયા સહિત આઠ કર્મચારીઓની સઘન પૂછપરછ હાથ ધરી હતી. તપાસ દરમિયાન બહાર આવ્યું હતું કે રોશની કાનપુરના નીરજ નામના યુવક સાથે સતત સંપર્કમાં હતી. પોલીસે તાત્કાલિક વિસ્તારના આશરે ૧૦૦ થી વધુ સીસીટીવી કેમેરાના ફૂટેજ ચકાસીને અને રોશનીના કોલ ડિટેલ રેકોર્ડ્સ (CDR) ના આધારે બંનેનું લોકેશન ટ્રેસ કરીને કાનપુર ખાતે દરોડો પાડી તેમને કસ્ટડીમાં લીધા હતા.

પોલીસ સુત્રોના જણાવ્યા મુજબ, ઝડપાયેલા બંને આરોપીઓની કડક પૂછપરછ કરવામાં આવી રહી છે, પરંતુ ચોરી કરાયેલો કરોડોનો મુદ્દામાલ હજુ સુધી રિકવર થઈ શક્યો નથી. આશંકા સેવાઈ રહી છે કે બંનેએ ચોરેલા ઘરેણાં અને રોકડ નીરજના કોઈ સગાં કે મિત્રના ઘરે છુપાવી રાખ્યા છે. આથી પોલીસ દ્વારા કાનપુર અને આસપાસના અન્ય આશ્રયસ્થાનો પર દરોડા પાડવાની કામગીરી ચાલુ રાખવામાં આવી છે.

બીજી તરફ, ચામાં ઝેર જેવી ઊંઘની ગોળીઓનો તીવ્ર ડોઝ મળવાથી ગંભીર હાલતમાં હોસ્પિટલમાં ખસેડાયેલા રેખા ભલ્લાની સ્થિતિ હવે સુધારા પર અને ખતરા બહાર હોવાનું તબીબોએ જણાવ્યું છે. પીડિત ઉદ્યોગપતિની ફરિયાદના આધારે સંબંધીત પોલીસ સ્ટેશનમાં ચોરી અને વિશ્વાસઘાતની ગંભીર કલમો હેઠળ ગુનો નોંધવામાં આવ્યો છે.

નોંધનીય છે કે, મવાના રોડ પર આવેલી આ હાઈ-પ્રોફાઈલ ડિફેન્સ કોલોનીમાં અગાઉ પણ નિવૃત્ત કર્નલ પર હુમલો અને ન્યાયાધીશના ઘરે ચોરી જેવી ઘટનાઓ બની ચૂકી છે. આ તાજેતરની કરોડોની ચોરી બાદ સ્થાનિક વહીવટી તંત્ર દ્વારા કોલોનીના પ્રવેશદ્વારો પર સુરક્ષા વ્યવસ્થા અત્યંત કડક કરી દેવામાં આવી છે અને તમામ રહેવાસીઓને પોતાના ઘરેલુ નોકરોનું પોલીસ વેરિફિકેશન કરાવવા માટે આદેશ જારી કરવામાં આવ્યા છે.