પુણે : ભારતમાં સૌથી વધુ વરસાદ માટે અત્યાર સુધી મેઘાલયના ચિરાપુંજી અને મૌસિનરામ જાણીતા હતા, પરંતુ મહારાષ્ટ્રના પુણે જિલ્લામાં આવેલું ‘તામહિણી ઘાટ’ હવે દેશનું નવું ‘રેન કેપિટલ’ બની ગયું છે. ચોમાસાની આ સિઝનમાં સતત ત્રીજા વર્ષે તામહિણી ઘાટે ૯,૦૦૦ મિલીમીટર (mm) થી વધુ વરસાદનો ઐતિહાસિક આંકડો વટાવીને એક નવો જ કીર્તિમાન સ્થાપિત કર્યો છે.

હવામાન વિભાગના ડેટા અનુસાર, પશ્ચિમ ઘાટની સહ્યાદ્રી પર્વતમાળાના શિખર પર આવેલું તામહિણી ઘાટ આ વર્ષે ફરી એકવાર દેશનું સૌથી વધુ વરસાદ ધરાવતું સ્થળ બની ગયું છે. મેઘાલયના પૂર્વોત્તર વિસ્તારોમાં આ વર્ષે વરસાદનું પ્રમાણ ઘટ્યું છે, ત્યારે બીજી તરફ તામહિણીમાં આકાશમાંથી મુસળધાર આફત વરસી રહી છે, જેણે સ્થાનિક અને રાષ્ટ્રીય હવામાન નિષ્ણાતોને પણ આશ્ચર્યમાં મૂકી દીધા છે.

નિષ્ણાતોના જણાવ્યા અનુસાર, તામહિણી ઘાટ સમુદ્ર સપાટીથી ખૂબ ઊંચાઈ પર આવેલું છે. અરબી સમુદ્ર પરથી આવતા ભેજયુક્ત પવનો જ્યારે સહ્યાદ્રીની પર્વતમાળાઓ સાથે ટકરાય છે, ત્યારે ત્યાં અત્યંત ઘનઘોર વાદળોનો જમાવટો થાય છે. આ જ સ્થાનિક ભૌગોલિક સ્થિતિને કારણે અહીં સતત ધોધમાર વરસાદ વરસે છે. આ અસાધારણ ફેરફાર અને કુદરતના બદલાતા મિજાજ અંગે વધુ ઊંડો અભ્યાસ કરવા માટે હવામાન વિજ્ઞાનીઓ આહ્વાન કરી રહ્યા છે.