મુંબઈ : દેશના ડ્રીમ પ્રોજેક્ટ ગણાતા મુંબઈ-અમદાવાદ બુલેટ ટ્રેન કોરિડોરે મહારાષ્ટ્રમાં એક નવો અને મહત્વપૂર્ણ સીમાચિહ્ન સર કર્યો છે. થાણે જિલ્લાના ભિવંડી નજીક દિવે-અંજુર ગામ પાસે નેશનલ હાઈ-વે-૩ (મુંબઈ-નાશિક હાઈ-વે) પર બુલેટ ટ્રેનનો ૧૦૦ મીટર લાંબો અને ૧,૪૦૫ મેટ્રિક ટન વજન ધરાવતો વિશાળ સ્ટીલ બ્રિજ સફળતાપૂર્વક લોન્ચ કરવામાં આવ્યો છે. મહારાષ્ટ્ર ક્ષેત્રમાં આ પ્રોજેક્ટ માટે પૂર્ણ કરવામાં આવેલો આ સર્વપ્રથમ સ્ટીલ બ્રિજ છે, જે હાઈ-સ્પીડ રેલના એલિવેટેડ કોરિડોરનો અતિ મહત્વનો ભાગ બનશે.

આ એન્જિનિયરિંગ અજાયબીની ખાસ વાત એ છે કે આખા બ્રિજનું નિર્માણ તમિલનાડુના ત્રિચી સ્થિત વર્કશોપમાં કરવામાં આવ્યું હતું. ત્યાંથી તૈયાર પાર્ટ્સને આશરે ૧,૩૦૦ કિલોમીટર દૂર મહારાષ્ટ્ર લાવવામાં આવ્યા હતા અને ઘટનાસ્થળે ૧૭.૫ મીટરની ઊંચાઈએ કામચલાઉ ટ્રેસ્ટલ્સ પર તેને એસેમ્બલ કરવામાં આવ્યા હતા. ત્યારબાદ ખાસ સ્કિડ અરેન્જમેન્ટ, હેવી જેક્સ અને પ્રી-ટેન્શન કરાયેલા મેકએલોય બાર્સની મદદથી હાઈ-વે પર વાહનવ્યવહારને ખલેલ પહોંચાડ્યા વિના રાત્રિના સમયે આ ૧૪ મીટર પહોળા અને ૧૪ મીટર ઊંચા બ્રિજને નિર્ધારિત સ્થાને સ્થાપિત કરાયો હતો.

મુંબઈ-અમદાવાદ ૫૦૮ કિલોમીટર લાંબા હાઈ-સ્પીડ રેલ કોરિડોરમાં કુલ ૨૮ સ્ટીલ બ્રિજ બનાવવાનું આયોજન છે, જેમાંથી ૧૬ બ્રિજનું નિર્માણ કાર્ય પૂર્ણ થઈ ચૂક્યું છે. નેશનલ હાઈ-સ્પીડ રેલ કોર્પોરેશન લિમિટેડ (NHSRCL) ના સપ્ટેમ્બર ૨૦૨૬ના અપડેટ મુજબ, સમગ્ર પ્રોજેક્ટનું ૬૨.૧૬ ટકા પ્રત્યક્ષ કામ પૂર્ણ થઈ ગયું છે અને ૩૬૬ કિલોમીટરથી વધુ વાયડક્ટ પર ગર્ડર લગાવી દેવાયા છે. મહારાષ્ટ્રમાં સ્ટીલ બ્રિજનું આ લોન્ચિંગ ભારતની જટિલ ઇન્ફ્રાસ્ટ્રક્ચર રચનાઓ માટેની સ્વદેશી ક્ષમતા અને એન્જિનિયરિંગ કૌશલ્યનું શ્રેષ્ઠ ઉદાહરણ પૂરું પાડે છે.