મુંબઈ : મહારાષ્ટ્રમાં ચાલી રહેલી મતદાર યાદીની ખાસ સુધારણા ઝુંબેશ એટલે કે 'સ્પેશિયલ ઇન્ટેન્સિવ રિવિઝન' (SIR) ને લઈને રાજ્યના મુખ્ય ચૂંટણી અધિકારી એસ. ચોકાલિંગમે એક અત્યંત મહત્વપૂર્ણ નિર્દેશ જારી કર્યો છે. નાગરિકોની સુવિધા માટે હવે ચૂંટણી અધિકારીઓ (BLOs) ને વોટ્સએપ (WhatsApp) પર મોકલવામાં આવેલા મતદારના દસ્તાવેજો સ્વીકારવાના આદેશ આપવામાં આવ્યા છે. જો દસ્તાવેજોમાં કોઈ વિસંગતતા કે શંકા જણાશે, તો બૂથ લેવલ ઓફિસર્સ (BLOs) પોતે સંબંધિત નાગરિકના ઘરે જઈને સ્થળ પર જ ચકાસણી કરશે.

ECINet સોફ્ટવેર અને WhatsApp નો સમન્વય

રાજ્ય ચૂંટણી પંચના અધિકારીએ આપેલી માહિતી મુજબ, ECINet સોફ્ટવેર દ્વારા જારી કરવામાં આવેલી નોટિસના જવાબમાં નાગરિકો જરૂરી કાગળો સીધા પોતાના વિસ્તારના BLO ના WhatsApp પર મોકલી શકશે. આ ઉપરાંત, ચૂંટણી પંચે ECINet સિસ્ટમમાં જરૂરી સુધારા કરવા વિનંતી કરી છે, જેથી 'ઈલેક્ટોરલ રજીસ્ટ્રેશન ઓફિસર્સ' (EROs) મતદાર યાદીના નામો અંગે પોતાના વિવેકબુદ્ધિનો ઉપયોગ કરી નિર્ણય લઈ શકે. જોકે, કોંગ્રેસ સહિતના વિપક્ષોએ આક્ષેપ કર્યો છે કે આ નવી સિસ્ટમથી અધિકારીઓની કાયદેસરની સત્તાઓ નબળી પડી રહી છે.

અરજી કરવાની મુદત લંબાવી ૧૨ ઓક્ટોબર કરાઈ

મહારાષ્ટ્રમાં મતદાર યાદી સુધારણા સંબંધિત દાવાઓ અને વાંધાઓ રજૂ કરવાની સમયસીમા જે અગાઉ ૩૦ સપ્ટેમ્બર હતી, તેને હવે લંબાવીને ૧૨ ઓક્ટોબર કરવામાં આવી છે. તમામ નોટિસો અને વાંધાઓનો નિકાલ ૧૦ નવેમ્બર સુધીમાં કરવામાં આવશે, જ્યારે આખરી અને આખરી મતદાર યાદીનું પ્રકાશન ૧૬ નવેમ્બરના રોજ થશે.

ચૂંટણી કમિશનરોના વિરોધના અહેવાલો વચ્ચે ચૂંટણી પંચ વિવાદમાં

બીજી તરફ, આખી પ્રક્રિયા વચ્ચે મુખ્ય ચૂંટણી કમિશનર જ્ઞાનેશ કુમાર અને ચૂંટણી પંચ ભારે ટીકાઓનો સામનો કરી રહ્યા છે. એક સનસનાટીભર્યા અહેવાલ મુજબ, ચૂંટણી કમિશનર સુખબીર સિંહ સંધુ અને વિવેક જોશીએ છેલ્લા ૧૦ મહિનામાં ઓછામાં ઓછી ૧૪ વખત SIR સંબંધિત એકતરફી આદેશો સામે વાંધો ઉઠાવ્યો હતો અને કેટલાક નિર્ણયો તેમની જાણ બહાર લેવાયા હોવાનો દાવો કર્યો હતો. વિપક્ષોએ સત્તાધારી પક્ષને ફાયદો પહોંચાડવાનો આરોપ લગાવ્યો છે, જોકે ચૂંટણી પંચે સ્પષ્ટતા કરી છે કે તમામ નિર્ણયો પંચના ત્રણેય સભ્યોની સર્વસંમતિથી જ લેવામાં આવ્યા છે.