મુંબઈ, તા. ૦૯: મહારાષ્ટ્ર સરકાર દેશમાં રિયલ એસ્ટેટ અને જમીન-મિલકતના ક્ષેત્રે એક મોટો ડિજિટલ વિસ્ફોટ કરવા જઈ રહી છે. રાજધાની મુંબઈ ખાતે આયોજિત 'ગ્લોબલ ફિનટેક ફેસ્ટ (GFF) 2026'માં બોલતાં મહારાષ્ટ્રના નાયબ મુખ્યમંત્રી દેવેન્દ્ર ફડણવીસે જાહેરાત કરી હતી કે રાજ્ય સરકાર જમીન અને સ્થાવર મિલકતોના બ્લોકચેન-આધારિત ટોકનાઇઝેશન માટે એક વિશેષ કાનૂની માળખું 'ડેલ્ટા એક્ટ' (DELTA Act - Digitalisation and Exchange of Land Token Asset Act) લાવવાની તૈયારી કરી રહી છે. આ પગલાથી મિલકતોમાં સટ્ટાબાજી રોકાશે અને વણવપરાયેલી કે નિષ્ક્રિય સંપત્તિઓ આર્થિક તકોમાં રૂપાંતરિત થશે.

બ્લોકચેન અને ટોકનાઇઝેશનથી કેવી રીતે બદલાશે ચિત્ર?

ટોકનાઇઝેશન એક એવી આધુનિક ટેકનોલોજી છે, જેના દ્વારા કોઈપણ ભૌતિક જમીન કે મિલકતની માલિકીના અધિકારોને બ્લોકચેન પર ડિજિટલ ટોકન સ્વરૂપે સુરક્ષિત કરવામાં આવે છે. ફડણવીસે જણાવ્યું હતું કે, જે રીતે યુનિફાઇડ પેમેન્ટ્સ ઇન્ટરફેસ (UPI) એ દેશમાં ડિજિટલ વ્યવહારોનું ચિત્ર બદલી નાખ્યું, તે જ રીતે 'ડેલ્ટા એક્ટ' દ્વારા મિલકત બજારમાં પારદર્શિતા આવશે, બનાવટી દસ્તાવેજોનો ખેલ ખતમ થશે અને સામાન્ય રોકાણકારો માટે પણ પ્રોપર્ટી માર્કેટમાં પ્રવાહીતા (Liquidity) વધશે.

એજન્ટિક AI, ક્વોન્ટમ કમ્પ્યુટિંગ અને ટોકનાઇઝેશન બનશે ભવિષ્ય:

GFF 2026 ના અધ્યક્ષ અને ઈન્ફોસિસના સહ-સ્થાપક ક્રિસ ગોપાલકૃષ્ણનએ આ તકે જણાવ્યું હતું કે, આગામી દાયકામાં એજન્ટિક આર્ટિફિશિયલ ઈન્ટેલિજન્સ, ક્વોન્ટમ કમ્પ્યુટિંગ અને બ્લોકચેન ટોકનાઇઝેશન વૈશ્વિક નાણાકીય સેવાઓને નવો આકાર આપશે. તેમણે ઉમેર્યું હતું કે ભારત ઓપન અને સસ્તા પબ્લિક ઈન્ફ્રાસ્ટ્રક્ચર દ્વારા નવીનતાના આગામી તબક્કાનું નેતૃત્વ કરવા માટે સંપૂર્ણ રીતે તૈયાર છે.

ગ્લોબલ ફિનટેક ફેસ્ટમાં દેશ-વિદેશના મિશનરીઓનું મહાસંમેલન:

એનપીસીઆઈ (NPCI)ના એક્ઝિક્યુટિવ ડિરેક્ટર સોહિની રાજોલાએ જણાવ્યું હતું કે, મુંબઈના જિયો વર્લ્ડ સેન્ટર ખાતે ૮ થી ૧૧ સપ્ટેમ્બર દરમિયાન આયોજિત આ ચાર દિવસીય ગ્લોબલ ફિનટેક ફેસ્ટ માત્ર એક કોન્ફરન્સ નથી, પરંતુ વિશ્વભરના નીતિ નિર્માતાઓ, નિયમનકારો અને ફિનટેક કંપનીઓને એકમંચ પર લાવીને નવી નીતિઓ ઘડવાનું સશક્ત માધ્યમ બની ગયું છે.