મુંબઈ, તા.૧૮: મહારાષ્ટ્રમાં રેલવે ઈન્ફ્રાસ્ટ્રક્ચરને મજબૂત કરવા અને ટ્રેનોની અવરજવરને વધુ સુગમ બનાવવાના હેતુથી ભારતીય રેલવેએ એક મોટો નિર્ણય લીધો છે. રાજ્યમાં કનેક્ટિવિટી વધારવા અને માલવાહક તેમજ પેસેન્જર ટ્રેનોનું સંચાલન ઝડપી બનાવવા માટે ₹૯૯૦ કરોડના મૂલ્યના બે મહત્ત્વકાંક્ષી રેલવે પ્રોજેક્ટ્સને મંજૂરી આપવામાં આવી છે. આ પ્રોજેક્ટ્સ હેઠળ લાઇન ડબલિંગ અને નવા રેલવે કોરિડોરનું નિર્માણ કરવામાં આવશે, જેનાથી મુસાફરોનો સમય બચશે અને ઔદ્યોગિક પરિવહનને ભારે વેગ મળશે.

પ્રથમ પ્રોજેક્ટ હેઠળ સેન્ટ્રલ રેલવેના ચૌક-કરજત સેક્શન વચ્ચે ૧૦.૮૬ કિલોમીટર લાંબા ટ્રેકનું ₹૪૯૭ કરોડના ખર્ચે ડબલિંગ (બેવડી લાઇન) કરવામાં આવશે. પનવેલ-ચૌક-કરજત રૂટ પર હાલમાં સિંગલ લાઇન હોવાથી ટ્રેનોના વિલંબની સમસ્યા નડતી હતી. આ કામ પૂર્ણ થતાં જ બંને દિશામાં દરરોજ ૫ નવી વધારાની મુસાફર ટ્રેનો શરૂ થઈ શકશે. આ ઉપરાંત, આ રૂટ પરથી વાર્ષિક ૧૮.૩૫ મિલિયન ટન વધારાના માલસામાનની હેરફેર શક્ય બનશે, જેથી ગુડ્સ ટ્રેનોનો વિલંબ ઘટશે.

બીજા પ્રોજેક્ટ હેઠળ ₹૪૯૩ કરોડના ખર્ચે મુકુટબાન (આદિલાબાદ) થી ગડચંદુર વચ્ચે ૩૮.૨૧ કિલોમીટર લાંબી નવી રેલ લાઇન નાખવામાં આવશે. આ નવો કોરિડોર યવતમાળ અને ચંદ્રપુર જિલ્લાના પ્રખ્યાત સિમેન્ટ, કોલસા અને આયર્ન-સ્ટીલના ઔદ્યોગિક વિસ્તારોને સીધો ટૂંકો માર્ગ પૂરો પાડશે. નવી લાઇન શરૂ થવાથી વર્ધા-માણિકગઢ રૂટ પરનું ટ્રાફિકનું ભારણ ઘટશે. આ માર્ગ પર દરરોજ બે નવી MEMU પેસેન્જર ટ્રેનો દોડશે અને વાર્ષિક ૬.૦૮ મિલિયન ટન કોલસો, અનાજ તથા સિમેન્ટ જેવા માલસામાનનું પરિવહન સરળ બનશે.