સીઓનિ, મધ્યપ્રદેશ, તા. 04 જૂન, 2026: મધ્યપ્રદેશના સીઓનિ જિલ્લામાં ગુરુવારે એક હૃદયદ્રાવક ઘટના બની છે, જ્યાં કોંગ્રેસના ધારાસભ્ય યોગેન્દ્ર સિંહ 'બાબા' એક ગંભીર અકસ્માતમાં માંડ-માંડ બચ્યા છે. જબલપુરથી પોતાના વતન ગામ પરત ફરી રહેલા ધારાસભ્યની SUV રાષ્ટ્રીય ધોરીમાર્ગ-44 પર બંજરી ગામ પાસે ત્યારે દુર્ઘટનાનો શિકાર બની જ્યારે ડ્રાઇવરે રસ્તા પર અચાનક આવી ગયેલી ગાયને બચાવવાનો પ્રયાસ કર્યો હતો.

ગાયને બચાવવા જતાં થયો અકસ્માત અને આગનું તાંડવ

પ્રાણીને બચાવવાની ઉતાવળમાં ડ્રાઇવરે વાહન પરનો કાબૂ ગુમાવી દીધો અને SUV સીધી હાઈવે પર આવેલી એક શાળાની સીમા દિવાલ સાથે અથડાઈ ગઈ હતી. અકસ્માત એટલો જોરદાર હતો કે વાહનનો આગળનો ભાગ ખરાબ રીતે ક્ષતિગ્રસ્ત થઈ ગયો અને થોડી જ ક્ષણોમાં SUVમાંથી આગની જ્વાળાઓ નીકળવા લાગી હતી. ટક્કરને કારણે કારના દરવાજા પણ લોક થઈ ગયા હતા, જેને લઈને અંદર સવાર ધારાસભ્ય અને તેમના સાથીઓ થોડા સમય માટે ફસાઈ ગયા હતા.

સ્થાનિક દેવદૂતોએ કર્યું ધારાસભ્યનું જીવનદાન

ઘટનાની જાણ થતા જ આસપાસના ગ્રામજનો તાત્કાલિક ઘટનાસ્થળે દોડી આવ્યા હતા. લોકોએ પોતાની જીવના જોખમે આગની જ્વાળાઓની વચ્ચેથી ધારાસભ્ય યોગેન્દ્ર સિંહ બાબા, તેમના ગનમેન રાજુ ધુર્વે અને ડ્રાઇવર અન્નુને સુરક્ષિત રીતે બહાર કાઢ્યા હતા. ગ્રામજનોની આ સમયસૂચકતાના થોડી જ મિનિટો બાદ આખી SUV આગમાં લપેટાઈને રાખના ઢગલામાં ફેરવાઈ ગઈ હતી. જો ગ્રામજનોએ સમયસર મદદ ન કરી હોત તો આ ઘટના એક મોટી કરુણાંતિકા બની શકત.

હાલ ત્રણેયની તબિયત સ્થિર

અકસ્માત બાદ ત્રણેય ઘાયલોને તાત્કાલિક લખનાડોનની હોસ્પિટલમાં સારવાર માટે ખસેડવામાં આવ્યા હતા. મેડિકલ રિપોર્ટ અનુસાર, ધારાસભ્ય અને તેમના ગનમેનને સામાન્ય ઈજાઓ પહોંચી છે, જ્યારે ડ્રાઈવરને હોઠના ભાગે ઈજા થતા ટાંકા લેવા પડ્યા હતા. પ્રાથમિક સારવાર બાદ ત્રણેયને હોસ્પિટલમાંથી રજા આપી દેવામાં આવી છે. પોલીસ તંત્ર હવે આ સમગ્ર ઘટનાની વધુ તપાસ કરી રહ્યું છે.

આ ઘટનાએ ફરી એકવાર હાઈવે પર રખડતા ઢોર અને ટ્રાફિક સુરક્ષાને લઈને ગંભીર સવાલો ઉભા કર્યા છે, પરંતુ સૌભાગ્યવશ, ધારાસભ્ય અને તેમના સાથીદારોનો જીવ બચી જતા તેમના સમર્થકોએ રાહતનો શ્વાસ લીધો છે.