નવી દિલ્હી:  વિશ્વસ્તરે ઉર્જા સંકટ ઘેરાઈ રહ્યું છે ત્યારે ભારતને લઈને 'નિક્કી એશિયા'ના એક અહેવાલે સોશિયલ મીડિયા પર ખળભળાટ મચાવી દીધો હતો. આ રિપોર્ટમાં દાવો કરાયો હતો કે દુનિયાનો ત્રીજો સૌથી મોટો ગ્રાહક ભારત, દરરોજ 400,000 બેરલ LPGની અછતનો સામનો કરી રહ્યો છે. આ આંકડો ગભરાટ ફેલાવે તેવો હતો કારણ કે રસોઈ ગેસ પર કરોડો પરિવારો નિર્ભર છે. જોકે, ભારત સરકારે આ અહેવાલને સદંતર નકારી કાઢીને સ્પષ્ટ કર્યું છે કે દેશમાં ગેસનો કોઈ તોટો નથી. પેટ્રોલિયમ મંત્રાલયના સંયુક્ત સચિવ સુજાતા શર્માએ ખાતરી આપી છે કે સ્થાનિક ઉત્પાદનમાં 46,000-47,000 ટનનો વધારો કરીને સરકારે સ્થિતિ પર સંપૂર્ણ કાબૂ મેળવી લીધો છે.

જોકે, આંતરરાષ્ટ્રીય સ્તરે સ્થિતિ ચોક્કસપણે પડકારજનક છે. ભારત અગાઉ તેની LPGની 60% જરૂરિયાત આયાત કરતું હતું, જેનો 90% હિસ્સો હોર્મુઝ સ્ટ્રેટ જેવી સંવેદનશીલ ચેનલ દ્વારા આવતો હતો. પશ્ચિમ એશિયાના તણાવને જોતા મોદી સરકારે અગમચેતી વાપરીને 'પ્લાન-B' અમલમાં મૂક્યો છે. હવે ભારત માત્ર મધ્ય-પૂર્વના દેશો પર નિર્ભર રહેવાને બદલે ઓસ્ટ્રેલિયા, આર્જેન્ટિના અને અમેરિકા જેવા દેશો પાસેથી પણ ગેસ મંગાવી રહ્યું છે. ભલે આ દેશોથી શિપમેન્ટ પહોંચતા 20 થી 45 દિવસ લાગે છે, પરંતુ પુરવઠામાં કોઈ લાંબો બ્રેક ન પડે તે માટે સરકારે આયાતના સ્ત્રોતોમાં વૈવિધ્યીકરણ  કર્યું છે.

સામાન્ય જનતા માટે રાહતના સમાચાર એ છે કે ઓઈલ માર્કેટિંગ કંપનીઓ જેમ કે HPCL એ પણ ગ્રાહકોને અફવાઓથી દૂર રહેવા વિનંતી કરી છે. કંપનીઓએ સ્પષ્ટ કર્યું છે કે રિટેલ આઉટલેટ્સ પર પુરવઠો સામાન્ય છે અને ગભરાટમાં આવીને બુકિંગ કરવાની જરૂર નથી. બીજી તરફ, કિંમતોમાં થયેલો વધારો સામાન્ય લોકોના ખિસ્સા પર થોડો ભાર ચોક્કસ વધારી રહ્યો છે. 1 મે 2026ના રોજ વાણિજ્યિક સિલિન્ડરના ભાવમાં ₹993નો તોતિંગ વધારો થયો છે, જે બતાવે છે કે સરકાર ભલે પુરવઠો જાળવી રાખે પણ વૈશ્વિક સંજોગોને કારણે ભાવ પર કાબૂ રાખવો મુશ્કેલ બની રહ્યો છે.