વાલુજ: મહારાષ્ટ્રના વાલુજ ઔદ્યોગિક વિસ્તારમાં એક એવી ઘટના બની છે જેણે માનવતા અને કાયદો-વ્યવસ્થા પર સવાલ ઊભા કરી દીધા છે. એક ૪૩ વર્ષીય મહિલાએ પોતાના ભૂતપૂર્વ પ્રેમીની પત્નીની તેના જ ઘરમાં ઘૂસીને અત્યંત નિર્મમ રીતે હત્યા કરી નાખી. આરોપી મહિલા એર પિસ્તોલ, તીક્ષ્ણ છરી અને મરી સ્પ્રે (Pepper Spray) જેવા હથિયારો સાથે સજ્જ થઈને આવી હતી, જે દર્શાવે છે કે આ હત્યા પૂર્વઆયોજિત કાવતરું હતું.
ઘરમાં ઘૂસીને સોફા પર બેઠી અને પછી શરૂ થયો મોતનો ખેલ
૨૨ એપ્રિલની સવારે બજાજનગરના સાંઈ શ્રદ્ધા પાર્કમાં આરોપી શૈલા સોનાર પીડિતા સાધના સોનપેઠકરના ઘરે પહોંચી હતી. શરૂઆતમાં તે ડ્રોઈંગ રૂમના સોફા પર શાંતિથી બેઠી હતી. જ્યારે સાધનાની ૬૫ વર્ષીય સાસુ કેશરબાઈએ તેની પૂછપરછ કરી, ત્યારે બંને વચ્ચે ઉગ્ર બોલાચાલી થઈ. આ દરમિયાન સાધના રૂમમાં આવતા જ શૈલાએ પોતાની અસલી ફિતરત બતાવી અને એર ગન કાઢી સાધનાના માથા પર તાકી દીધી.
સાસુએ બહાદુરી બતાવી પણ ‘મરી સ્પ્રે’ ભારે પડ્યો
ઝપાઝપી દરમિયાન વૃદ્ધ સાસુએ હિંમત બતાવીને એર ગન છીનવી લીધી અને તેને બારીમાંથી બહાર ફેંકી દીધી જેથી ગોળીબાર ન થાય. જોકે, ઝનૂની બનેલી શૈલાએ તરત જ મરીનો સ્પ્રે કાઢી સાસુ અને વહુ બંનેની આંખોમાં છાંટ્યો. સ્પ્રેને કારણે બંને અશક્ત બની ગયા અને તે જ તકનો લાભ ઉઠાવી શૈલાએ તીક્ષ્ણ છરી વડે સાધના પર એક પછી એક ૧૦ થી વધુ ઘા ઝીંક્યા. ગળા, માથા અને ચહેરા પર થયેલા આ હિંસક હુમલામાં સાધનાનું ઘટનાસ્થળે જ કમકમાટીભર્યું મોત નીપજ્યું હતું.
અંગત અદાવત અને નાણાકીય વિવાદ કારણભૂત
પોલીસ તપાસમાં બહાર આવ્યું છે કે આરોપી શૈલા સોનારના પીડિતાના પતિ મહેન્દ્ર સાથે અગાઉ સંબંધો હતા. ઓગસ્ટ ૨૦૨૪માં શૈલાએ મહેન્દ્ર વિરુદ્ધ જાતીય શોષણ અને નાણાકીય છેતરપિંડીની ફરિયાદ પણ નોંધાવી હતી. પોલીસ કમિશનર પ્રવીણ પવારના જણાવ્યા અનુસાર, લાંબા સમયથી ચાલતા આ અંગત અને આર્થિક વિવાદે જ આ હિંસક સ્વરૂપ ધારણ કર્યું છે.
સમગ્ર વિસ્તારમાં ભયનો માહોલ
ઘટનાની જાણ થતા જ MIDC વાલુજ પોલીસ ઘટનાસ્થળે પહોંચી હતી અને ત્રણ માળની ઈમારતના એપાર્ટમેન્ટમાં છુપાયેલી આરોપી શૈલાની ધરપકડ કરી હતી. હુમલા દરમિયાન શૈલાને પણ સામાન્ય ઈજાઓ થઈ હતી. બે કિશોરવયના બાળકોએ પોતાની માતા ગુમાવતા પરિવારમાં આક્રંદ છવાઈ ગયો છે. આ ક્રૂર હત્યાએ સમગ્ર વાલુજ વિસ્તારને હચમચાવી દીધો છે.