લોની (ગાઝિયાબાદ) : રાષ્ટ્રીય રાજધાની ક્ષેત્ર (NCR) હેઠળ આવતું ઉત્તર પ્રદેશનું લોની શહેર હાલમાં ગંભીર વાયુ પ્રદૂષણની ઝપેટમાં આવી ગયું છે, જ્યાં દિવાળીના તહેવાર અને ફટાકડાના ધુમાડા બાદ હવાની ગુણવત્તા એટલી હદે કથળી ગઈ છે કે આખો વિસ્તાર એક 'ગેસ ચેમ્બર'માં ફેરવાઈ ગયો છે.

પ્રાપ્ત વિગતો અનુસાર, સ્વિસ મોનિટરિંગ એજન્સી IQAir અને આંતરરાષ્ટ્રીય અહેવાલો મુજબ છેલ્લા ૧૨ મહિનામાં લોનીમાં સરેરાશ PM2.5 સ્તર વિશ્વ આરોગ્ય સંસ્થા (WHO) ની સુરક્ષિત મર્યાદા કરતા ૨૨ ગણા વધારે નોંધાયું છે, જેના કારણે આ શહેર વૈશ્વિક સ્તરે સૌથી વધુ પ્રદૂષિત વીસ વિસ્તારોમાં સ્થાન પામ્યું છે.

આ ગંભીર સ્થિતિ પાછળ મુખ્ય કારણોમાં લોની અને આસપાસના વિસ્તારોમાં ધાતુ ઓગાળતી ગેરકાયદેસર ભઠ્ઠીઓ અને ઔદ્યોગિક ધુમાડો જવાબદાર છે, જે હવામાં ઝેરી રસાયણો ભળી રહ્યા છે અને નાગરિકોના સ્વાસ્થ્ય માટે હૃદયરોગ તથા કેન્સર જેવા ખતરા ઊભા કરી રહ્યા છે.

આ ઉપરાંત, નબળા અને ધૂળથી ભરાયેલા કાચા-પાકા રસ્તાઓ, સતત ચાલતા બાંધકામ પ્રોજેક્ટ્સ, ભારે વાહનો તથા હાઇવે પરથી પસાર થતા ટ્રકોનો સતત ટ્રાફિક અને ખુલ્લામાં કચરો સળગાવવાની પ્રવૃત્તિઓએ સ્થિતિને વધુ વણસાવી દીધી છે.

સ્થાનિક ભૌગોલિક સ્થિતિ અને શિયાળાની ઋતુમાં તાપમાન ઘટવાને કારણે પ્રદૂષકના કણો હવામાં નીચી સપાટીએ જ ફસાઈ જાય છે, જેના પરિણામે સલ્ફર ડાયોક્સાઇડ અને નાઇટ્રોજન ઓક્સાઇડ જેવા હાનિકારક તત્વોની રાસાયણિક પ્રક્રિયાથી આ પ્રદેશની હવા અત્યંત ઘાતક બની રહી છે.

આ ભયાનક પ્રદૂષણથી રાહત મેળવવા માટે તંત્ર અને સક્ષમ અધિકારીઓ દ્વારા આગામી સમયમાં કયા કડક પગલાં લેવામાં આવે છે અને પ્રદૂષણ નિયંત્રણ માટે કેવા શિસ્તબદ્ધ પ્રયાસો હાથ ધરવામાં આવે છે તે જોવું હવે ખૂબ જ મહત્વપૂર્ણ બની રહેશે.