તેલ અવીવ:મધ્ય-પૂર્વમાં તણાવ તેની ચરમસીમાએ પહોંચી ગયો છે. ઈઝરાયેલ અને હિઝબુલ્લાહ વચ્ચે સ્થાનિક સમય મુજબ સાંજે ૪ વાગ્યે યુદ્ધવિરામ લાગુ થવાની જાહેરાત કરાઈ હતી, પરંતુ આ સમજૂતીની ૫ જ મિનિટમાં ઈઝરાયેલી લડાકુ વિમાનોએ દક્ષિણ લેબનોનના નાબતિહ અલ-ફાવકા પર ફરી બોમ્બમારો શરૂ કરી દીધો હતો. તાજેતરમાં હિઝબુલ્લાહના એક વિસ્ફોટક હુમલામાં આઈડીએફ (IDF) ના એક ટેન્કને નિશાન બનાવાયું હતું, જેમાં ૪ ઈઝરાયેલી સૈનિકોના મોત થયા હતા. આ ઘટના બાદ રાતોરાત નાબતિહ, કફર તેબનિત અને કફર સીર વિસ્તારોમાં ભીષણ હવાઈ હુમલા કરવામાં આવ્યા હતા, જેમાં ઓછામાં ઓછા ૧૮ લોકોના મોત થયા છે. અમેરિકાના એક અધિકારીના દાવા મુજબ નેતન્યાહૂ યુદ્ધવિરામ માટે સંમત થયા હતા, પરંતુ તેમના કાર્યાલયે કોઈ પુષ્ટિ કરી નથી. લેબનોન બોર્ડર પર આવેલા ઝરીત વિસ્તારમાં ડ્રોન એલર્ટ પણ વાગ્યા છે, જ્યારે ટાયર (Tyre) શહેરના લોકો આ સતત હુમલાઓ વચ્ચે 'યુદ્ધવિરામ' નો અર્થ શોધી રહ્યા છે.

હિઝબુલ્લાહનું આકરું વલણ - શાંતિની કોઈ શક્યતા નકારી:

અમેરિકા-ઈરાન વચ્ચેના તાજેતરના એમઓયુ (MoU) અને લેબનોનમાં યુદ્ધવિરામ તૂટ્યા બાદ, હિઝબુલ્લાહના નેતા નઈમ કાસમે મૌન તોડતા સ્પષ્ટ કર્યું છે કે લેબનોન તેના ઈતિહાસના સૌથી ખતરનાક તબક્કામાંથી પસાર થઈ રહ્યું છે અને તેઓ સમાધાનના કોઈ મૂડમાં નથી. તેમણે આક્ષેપ કર્યો હતો કે અમેરિકા, ઈઝરાયેલ અને આંતરરાષ્ટ્રીય શક્તિઓ દ્વારા પ્રતિકારને મૂળમાંથી ઉખેડી નાખવાનું કાવતરું ઘડાયું છે. તેમણે જણાવ્યું કે આ યુદ્ધના પહેલા તબક્કામાં નાગરિકોની હત્યા કરીને મનોબળ તોડવાનો પ્રયાસ થયો, જ્યારે બીજા તબક્કામાં સીરિયાના પતનના બહાને સત્તાનું સંતુલન બદલવા અને કરારોનું ઉલ્લંઘન કરી ફાયદો ઉઠાવવાનો પ્રયાસ થઈ રહ્યો છે.

ઈઝરાયેલી મંત્રીઓની ઉશ્કેરણીજનક નિવેદનબાજી અને આઈડીએફનો દાવો:

સૈનિકોના મોતથી રોષે ભરાયેલા ઈઝરાયેલના કટ્ટરપંથી મંત્રીઓએ આકરા પ્રહારો કર્યા હતા. મંત્રી બેન-ગ્વીરે આંતરરાષ્ટ્રીય દબાણને ફગાવતા કહ્યું કે, "ઈઝરાયેલી માતાના એક આંસુની સામે એક હજાર લેબનીઝ માતાઓએ રડવું પડશે, આખું લેબનોન સળગી જવું જોઈએ." અન્ય મંત્રી સ્મોટ્રિચે પણ હવે લેબનોનમાં "આગ સાથે વાત કરવાનો અને નરકના દરવાજા ખોલવાનો" સમય આવી ગયો હોવાનું જણાવ્યું હતું. વિદેશ મંત્રી સા'રે ટિપ્પણી કરી હતી કે જેઓ યુદ્ધના મેદાનમાં ઈઝરાયેલને હરાવી શકતા નથી તેઓ રાજદ્વારી, કાનૂની, માહિતી અને આર્થિક મોરચે લડવાનો પ્રયાસ કરે છે. મંત્રી અમીચાઈ ચિકલીએ ડોનાલ્ડ ટ્રમ્પ પર કતાર, પાકિસ્તાન અને તુર્કીના પ્રભાવ હેઠળ હોવાનો આક્ષેપ કરી તેઓ પૈસાથી ગેરમાર્ગે દોરાયા હોવાનું કહ્યું હતું. બીજી તરફ, આઈડીએફ પ્રવક્તાએ સ્પષ્ટ કર્યું કે રાજકીય સ્તરે કરારો થાય છે, પરંતુ સૈન્ય 'યલો લાઈન' પારના જોખમોનો ખાતમો કરવા સ્વતંત્ર કામગીરી ચાલુ રાખશે. આઈડીએફે દાવો કર્યો કે હિઝબુલ્લાહ પોતાની ક્ષમતાઓને બચાવવા માટે રક્ષણાત્મક લડાઈ લડી રહ્યું છે, જેને ઈઝરાયેલે યુદ્ધવિરામનું ઉલ્લંઘન ગણાવ્યું હતું.

અમેરિકા-ઈરાન સમિટ રદ અને હોર્મુઝની સ્થિતિ:

લેબનોનમાં વણસેલી સ્થિતિ વચ્ચે સ્વિટ્ઝર્લેન્ડના બર્ગનસ્ટોક રિસોર્ટમાં યોજાનારી અમેરિકા-ઈરાનની હાઈ-પ્રોફાઈલ સમિટ રદ કરવામાં આવી છે. વ્હાઇટ હાઉસના જણાવ્યા મુજબ જેડી વેન્સની ફ્લાઈટમાં વિલંબ અને લોજિસ્ટિકલ પડકારોને કારણે બેઠક મુલતવી રખાઈ છે. ઈરાનના વિદેશ મંત્રાલયના પ્રવક્તા ઈસ્માઈલ બકાઈના જણાવ્યા અનુસાર, જ્યાં સુધી વર્તમાન એમઓયુનો સંપૂર્ણ અમલ નહીં થાય ત્યાં સુધી જીનીવાની વાટાઘાટો સ્થગિત રહેશે. ઈરાને ઔપચારિક વાટાઘાટો શરૂ થાય તે પહેલાં લેબનોનમાં લશ્કરી હુમલાઓ રોકવાની કડક ગેરંટી માંગી છે. ઈરાની વિદેશ મંત્રી અરાગચીએ ઈઝરાયેલી મંત્રી બેન-ગ્વીરને માનસિક વિકૃત ગણાવી ઈઝરાયેલને માનવતા માટે ખતરનાક "જીનોસાઈડલ ડેથ કલ્ટ" ગણાવ્યું હતું, જે માત્ર કાયમી યુદ્ધ ઈચ્છે છે. આ તણાવને હળવો કરવા વોશિંગ્ટન સતત તેહરાનને ખાતરી આપી રહ્યું છે કે ઈઝરાયેલ લેબનોનમાં વધુ ઊંડે સુધી હુમલા નહીં કરે.

આ વૈશ્વિક ઉથલપાથલ વચ્ચે વૈશ્વિક ઊર્જા કોરિડોર સમાન હોર્મુઝની સમુદ્રધુનીમાં પણ તણાવ જોવા મળ્યો હતો. અમેરિકાના ભારે દબાણ છતાં ઈરાનની રાષ્ટ્રીય સુરક્ષા પરિષદે નવી 'ગલ્ફ સ્ટ્રેટ ઓથોરિટી' દ્વારા જહાજોનું સંચાલન કરવાની જાહેરાત કરી છે. જોકે, ઈરાનના વિદેશ મંત્રાલયે સમુદ્રધુની બંધ હોવાના અહેવાલોને નકારી કાઢ્યા છે. શિપ ટ્રેકિંગ ડેટા મુજબ ગુરુવારે ૨૫ જેટલા વ્યાપારી જહાજો પસાર થતા વાહનવ્યવહાર ધીમે ધીમે સામાન્ય થઈ રહ્યો હોવાનું જોવા મળ્યું છે.