ન્યુયોર્ક: ભારતીય સિનેમાના ઇતિહાસની સૌથી વધુ રાહ જોવાતી અને અતિ મહત્વાકાંક્ષી ફિલ્મ 'રામાયણ' હવે વૈશ્વિક ફલક પર પોતાની છાપ છોડી રહી છે. નિતેશ તિવારીના નિર્દેશનમાં બની રહેલા આ મહાકાવ્યમાં લક્ષ્મણની પ્રતિષ્ઠિત ભૂમિકા ભજવી રહેલા લોકપ્રિય અભિનેતા રવિ દુબેને ન્યુયોર્કના પ્રતિષ્ઠિત ટાઇમ્સ સ્ક્વેર બિલબોર્ડ પર સ્થાન મળ્યું છે. રણબીર કપૂરના 'રામ' લુક બાદ હવે રવિ દુબેના આ વૈશ્વિક પ્રદર્શને ચાહકોમાં ઉત્તેજના વધારી દીધી છે. ટાઇમ્સ સ્ક્વેર જેવા વિશ્વ વિખ્યાત સ્થળે પોતાનું વિશાળ પોસ્ટર જોઈને રવિ દુબે અત્યંત અભિભૂત થયા હતા અને ઇન્સ્ટાગ્રામ પર પોતાની ખુશી વ્યક્ત કરતા જણાવ્યું હતું કે, આટલા વર્ષોની મહેનત બાદ ચાહકોના આટલા મોટા પ્રેમથી તેઓ પોતાની જાતને ધન્ય અનુભવે છે.

નિર્માતા નમિત મલ્હોત્રાના ૪૦૦૦ કરોડ રૂપિયાના તોતિંગ બજેટ સાથે તૈયાર થઈ રહેલી આ ફિલ્મ માત્ર ભારત જ નહીં પરંતુ વિશ્વભરના પ્રક્ષકોનું ધ્યાન ખેંચી રહી છે. રણબીર કપૂર ભગવાન રામ તરીકે, સાઈ પલ્લવી સીતા માતા તરીકે, યશ રાવણ તરીકે અને સની દેઓલ હનુમાનજીના રોલમાં જોવા મળશે. જોકે, આ ફિલ્મ તેના રિલીઝ પહેલા જ વિવાદો અને ચર્ચાઓમાં પણ રહી છે. સોશિયલ મીડિયા પર કેટલાક લોકોએ ફિલ્મના વીડિયો ગેમ જેવા VFXની ટીકા કરી છે, તો બીજી તરફ ઋતિક રોશન જેવી દિગ્ગજ હસ્તીઓએ ફિલ્મના સમર્થનમાં આવીને તેની ભવ્યતાના વખાણ કર્યા છે. રવિ દુબેની લક્ષ્મણ તરીકેની આંતરરાષ્ટ્રીય સ્તરે થયેલી જાહેરાત ફિલ્મના પ્રચારમાં માસ્ટરસ્ટ્રોક સાબિત થઈ રહી છે.

આ વર્ષે દિવાળીના પવિત્ર તહેવાર પર ભવ્ય રિલીઝનું લક્ષ્ય ધરાવતી 'રામાયણ' બોક્સ ઓફિસના તમામ રેકોર્ડ તોડવા માટે સજ્જ છે. ફિલ્મની સ્ટારકાસ્ટ અને તેના નિર્માણ પાછળ ખર્ચવામાં આવેલી જંગી રકમ તેને અત્યાર સુધીની સૌથી ખર્ચાળ ભારતીય ફિલ્મ બનાવે છે. રવિ દુબેએ ટાઇમ્સ સ્ક્વેરના બિલબોર્ડ પર ચમક્યા બાદ ભારતીય ટેલિવિઝન અને ફિલ્મ કલાકારો માટે એક નવો માપદંડ સેટ કર્યો છે. અત્યારે સમગ્ર દેશમાં દિવાળીની રાહ જોવાઈ રહી છે, જ્યારે આ હાઇ-ટેક અને ભાવનાત્મક સફર મોટા પડદા પર જીવંત થશે. નિષ્ણાતોનું માનવું છે કે આ ફિલ્મ ભારતીય પૌરાણિક કથાઓને રજૂ કરવાની રીતમાં ક્રાંતિ લાવશે.