સિઓલ:  ઉત્તર કોરિયા અને દક્ષિણ કોરિયા વચ્ચે ફરી એકવાર લશ્કરી તણાવ ચરમસીમાએ પહોંચ્યો છે. ઉત્તર કોરિયાએ તેના પૂર્વીય સમુદ્રી ક્ષેત્ર તરફ આશરે 450 કિલોમીટરની રેન્જ ધરાવતી ટૂંકા અંતરની બેલિસ્ટિક મિસાઇલોનું પરીક્ષણ કર્યું છે. ઉત્તર કોરિયા દ્વારા પોતાની પરમાણુ પ્રતિરોધક ક્ષમતા વધારવા અને યુનાઇટેડ સ્ટેટ્સની "પ્રતિકૂળ પ્રવૃત્તિઓ" સામે જવાબ આપવાની ધમકી આપ્યાના આશરે બે દિવસ બાદ આ લોન્ચિંગ કરવામાં આવ્યું હતું. આ ઘટના બાદ દક્ષિણ કોરિયાએ સંયુક્ત રાષ્ટ્ર સુરક્ષા પરિષદ (UNSC) ને પત્ર લખીને ઉત્તર કોરિયા પર આવા મિસાઇલ પરીક્ષણો તાત્કાલિક બંધ કરવા અપીલ કરી છે.

દક્ષિણ કોરિયાની સૈન્યના જણાવ્યા અનુસાર, રવિવારે સવારે ઉત્તર કોરિયાએ પૂર્વ કિનારા તરફથી પ્રથમ મિસાઇલ છોડી હતી, જેણે સમુદ્રમાં 450 કિલોમીટરનું અંતર કાપ્યું હતું. તેના થોડા જ કલાકો બાદ ઉત્તર કોરિયા દ્વારા બીજી શંકાસ્પદ મિસાઇલ છોડવામાં આવી હોવાની વિગતો સામે આવી છે.

દક્ષિણ કોરિયાના રાષ્ટ્રપતિ કાર્યાલયે ઉત્તર કોરિયાની આ કાર્યવાહીની આકરી ટીકા કરતા જણાવ્યું હતું કે યુએન સુરક્ષા પરિષદના ઠરાવો હેઠળ બેલિસ્ટિક મિસાઇલ પરીક્ષણો પર સંપૂર્ણ પ્રતિબંધ છે. દક્ષિણ કોરિયાની સેનાએ સ્પષ્ટ કર્યું છે કે તે યુનાઇટેડ સ્ટેટ્સ સાથેના તેના મજબૂત જોડાણ હેઠળ ઉત્તર કોરિયા દ્વારા કરવામાં આવતી કોઈપણ લશ્કરી ઉશ્કેરણીનો યોગ્ય જવાબ આપવા પૂર્ણપણે તૈયાર છે.

બીજી તરફ, જાપાનના સંરક્ષણ મંત્રાલયે પણ રવિવારે સવારે ઉત્તર કોરિયાઈ મિસાઇલ લોન્ચિંગ શોધી કાઢ્યું હતું, પરંતુ તે હથિયાર જાપાનના પ્રાદેશિક પાણીમાં પડ્યું ન હોવાનું સ્પષ્ટ કર્યું છે.

આ મહિનાની શરૂઆતમાં ઉત્તર કોરિયાએ મિસાઇલો, તોપખાના અને ડ્રોન સાથેની એક મોટો સંયુક્ત અભ્યાસ કર્યો હતો. વાસ્તવમાં, યુનાઇટેડ સ્ટેટ્સ, દક્ષિણ કોરિયા અને જાપાન દ્વારા તેમની પાંચ દિવસીય ત્રિપક્ષીય લશ્કરી કવાયત પૂર્ણ કરવામાં આવી હતી, જેને ઉત્તર કોરિયાએ પોતાના માટે ઉશ્કેરણીજનક ગણાવી હતી. ઉત્તર કોરિયાના જણાવ્યા મુજબ, તેમની તાજેતરની કવાયતોનો મુખ્ય હેતુ દક્ષિણ કોરિયા અને યુએસની હવાઈ સંરક્ષણ પ્રણાલીઓને દબાવવાની ક્ષમતા વિકસાવવાનો છે.