​ઝુંઝુનું: રાજસ્થાનના ઝુંઝુનું જિલ્લાના ઘરડૂની ઢાણીના રહેવાસી અને ભારતીય નૌસેનામાં લીડિંગ એરક્રાફ્ટ ઓર્ડિનન્સ મિકેનિક તરીકે ફરજ બજાવતા વીર જવાન કુલદીપ દિવાચના નિધનથી સમગ્ર પંથકમાં શોકનું મોજું ફરી વળ્યું છે. દેશ સેવા દરમિયાન મુંબઈમાં એક દુઃખદ અકસ્માતનો ભોગ બન્યા બાદ શહીદ થયેલા કુલદીપને તેમના પેતૃક ગામમાં ભારે હૈયે અને પૂર્ણ સૈન્ય સન્માન સાથે અંતિમ વિદાય આપવામાં આવી હતી. કુદરતનો ક્રૂર સંયોગ એવો રહ્યો કે જે ૧૦ જુલાઈના દિવસે તેમનો ૨૭મો જન્મદિવસ હતો, તે જ દિવસે તેમની અંતિમયાત્રા નીકળતા ગામના સૌ કોઈના આંસુ છલકાઈ ગયા હતા.

​ડ્યુટી દરમિયાન સર્જાયો કરુણ અકસ્માત

મળતી માહિતી મુજબ, ૬ જુલાઈના રોજ મુંબઈમાં ફરજ પર જઈ રહેલા કુલદીપ દિવાચ પર અચાનક આવેલ વાવાઝોડાને કારણે ઝાડની ડાળી પડતા તેઓ ગંભીર રીતે ઈજાગ્રસ્ત થયા હતા. હોસ્પિટલમાં સારવાર દરમિયાન ૯ જુલાઈના રોજ તેમણે અંતિમ શ્વાસ લીધા હતા. ૨૦૧૮માં ભારતીય નૌસેનામાં જોડાયેલા કુલદીપની આકામિક વિદાયથી પરિવાર પર આભ તૂટી પડ્યું છે.

​પરિવાર પર આભ તૂટી પડ્યું

કુલદીપના પાર્થિવ દેહ જ્યારે તેમના ગામ પહોંચ્યા ત્યારે માતા સુભિતા, પત્ની સંગીતા અને અન્ય પરિજનોનું હૈયાફાટ રુદન જોઈને ત્યાં ઉપસ્થિત દરેક વ્યક્તિની આંખો ભીની થઈ ગઈ હતી. ખાસ કરીને ૧૮ મહિનાની તેમની માસૂમ દીકરી હર્ષિતા પોતાના પિતાને અંતિમ વાર નિહાળતી હતી, જે દ્રશ્ય અત્યંત હૃદયદ્રાવક હતું. તેમના પિતા સુભાષ ચંદ્રના નિધન બાદ, માતા સુભિતાએ આંગણવાડીમાં કામ કરીને અનેક સંઘર્ષો વેઠીને બંને દીકરાઓને ઉછેર્યા હતા. નોંધનીય છે કે કુલદીપના મોટા ભાઈ પ્રદીપ પણ ભારતીય વાયુસેનામાં દેશની સેવા કરી રહ્યા છે.

​સમગ્ર પંથકે આપી અશ્રુભીની વિદાય

શહીદ જવાનની અંતિમયાત્રામાં સુરજગઢથી ઘરડૂની ઢાણી સુધી તિરંગા યાત્રા કાઢવામાં આવી હતી. આ યાત્રામાં મોટી સંખ્યામાં ગ્રામજનો, પૂર્વ સૈનિકો, યુવાનો અને જનપ્રતિનિધિઓ જોડાયા હતા. ભારતીય નૌસેનાની ટુકડી દ્વારા ગાર્ડ ઓફ ઓનર આપીને તેમને સલામી આપવામાં આવી હતી.

​અંતિમ સંસ્કાર દરમિયાન પૂર્વ સાંસદ સંતોષ અહલાવત, ધારાસભ્ય શ્રવણ કુમાર, ધારાસભ્ય પીતરામ કાલા, સૈનિક કલ્યાણ અધિકારી સુરેશ જાગીડ, ડીવાયએસપી વિકાસ ધીંધવાલ તથા નૌસેનાના અન્ય અધિકારીઓએ પુષ્પાંજલિ અર્પણ કરી શહીદ જવાનને શ્રદ્ધાંજલિ પાઠવી હતી. ઝુંઝુનુંના આ વીર સપૂતે માત્ર ૨૭ વર્ષની વયે દેશ માટે આપેલા સર્વોચ્ચ બલિદાનને વિસ્તારના લોકો હંમેશા યાદ રાખશે.