ક્વેટા: પાકિસ્તાનના બલૂચિસ્તાન પ્રાંતના ક્વેટા શહેરમાં આતંકવાદી સંગઠન લશ્કર-એ-તૈયબા (એલઈટી) ના સિનિયર કમાન્ડર મીર શુક્ર ખાન રઈસાનીની અજાણ્યા બંદૂકધારીઓ દ્વારા ગોળી મારીને હત્યા કરી દેવામાં આવી છે. ભારત વિરોધી ગતિવિધિઓ ચલાવતા વધુ એક કટ્ટરપંથી આતંકીનો અજાણ્યા હુમલાખોરો દ્વારા ખાત્મો બોલાવવામાં આવ્યો છે.

મીર શુક્ર ખાન રઈસાની લશ્કર-એ-તૈયબા (એલઈટી) ના આતંકી નેટવર્કમાં એક અત્યંત મહત્વનો ચહેરો હતો. તે પાકિસ્તાનમાં યુવાનોની આતંકી સંગઠનમાં ભરતી કરવા (રિક્રૂટમેન્ટ), તેઓનું માઇન્ડવોશ કરી કટ્ટરપંથી બનાવવા (રેડિકલાઇઝેશન) અને આતંકવાદીઓને ટ્રેનિંગ કેમ્પમાં શસ્ત્રોની તાલીમ આપવાના નેટવર્કનું સંચાલન કરતો હતો. ભારતને નિશાન બનાવીને કરવામાં આવેલા અનેક આતંકી હુમલાઓમાં તેની સીધી સંડોવણી હતી.
પ્રાપ્ત વિગતો અનુસાર, રઈસાનીની હત્યા થઈ તેના બરાબર એક દિવસ પહેલા જ તેણે લશ્કર-એ-તૈયબાના એક કાર્યક્રમમાં સક્રિયપણે હાજરી આપી હતી.
આ કાર્યક્રમ બાદ અજાણ્યા હુમલાખોરોએ તેના પર હુમલો કરી તેને ઠાર માર્યો હતો. હુમલાખોરો કોણ હતા અને કયા જૂથ સાથે સંકળાયેલા છે તે અંગે હજુ સુધી કોઈ ચોક્કસ માહિતી સામે આવી શકી નથી.
હાલમાં પાકિસ્તાની સત્તાધીશો અને સુરક્ષા એજન્સીઓ દ્વારા આ હત્યા મામલે ઉચ્ચ સ્તરીય તપાસ શરૂ કરવામાં આવી છે. ઉલ્લેખનીય છે કે, છેલ્લા કેટલાક સમયથી પાકિસ્તાનમાં આશ્રય લઈ રહેલા અને ભારત વિરુદ્ધ આતંકી ગતિવિધિઓમાં સંડોવાયેલા વોન્ટેડ આતંકવાદીઓને અજાણ્યા હુમલાખોરો દ્વારા નિશાન બનાવવાની ઘટનાઓમાં સતત વધારો જોવા મળી રહ્યો છે. રઈસાનીનું મોત આ જ સિલસિલાની વધુ એક કડી માનવામાં આવે છે.