News of Wednesday, 18th November 2026
લશ્કર-એ-તૈયબાનો કમાન્ડર લતીફ ભટ એન્કાઉન્ટરમાં ઠાર કુલગામ હુમલાનો માસ્ટરમાઇન્ડ મસ્જિદમાં છુપાયો હતો

કુલગામ,તા.૧૮: જમ્મુ અને કાશ્મીરના કુલગામમાં સુરક્ષા દળોએ લશ્કર-એ-તૈયબાના આતંકવાદી લતીફ ભટને ઠાર માર્યો છે. તે એક મસ્જિદમાં છુપાયો હતો. અધિકારીઓના જણાવ્યા અનુસાર, તેને શરણાગતિ સ્વીકારવાની ઘણી તકો આપવામાં આવી હતી, પરંતુ તેણે ના પાડી દીધી. ત્યારબાદ સુરક્ષા દળોએ તેને બહાર કાઢવા માટે ટીયર ગેસના શેલ છોડ્યા. મસ્જિદમાંથી બહાર આવતાની સાથે જ તેને ગોળી મારી દેવામાં આવી.
કુલગામના SSP અનાયત અલીના જણાવ્યા અનુસાર, તેણે લતીફ ભટ સાથે લાંબા વિડીયો કોલ પર વ્યક્તિગત રીતે વાત કરી અને તેને શરણાગતિ સ્વીકારવા અને હથિયારો મૂકવા માટે સમજાવ્યો. તેને ખાતરી આપવામાં આવી હતી કે જો તે શરણાગતિ સ્વીકારે તો તેનો જીવ બચી જશે. જોકે, લતીફે આ ઓફરને નકારી કાઢી. ઓપરેશન દરમિયાન, તેણે અહેવાલ મુજબ કહ્યું હતું કે, અલ્લાહ સિવાય મારી સાથે કોઈ નથી.
એસએસપીના જણાવ્યા મુજબ, લતીફ સવારે ૨:૪૫ વાગ્યે મસ્જિદમાં ઘૂસી ગયો અને ગોળીબાર કર્યો. ત્યારબાદ સુરક્ષા દળોએ તેને બહાર કાઢવા માટે ટીયર ગેસના શેલ છોડ્યા. સુરક્ષા એજન્સીઓએ ધાર્મિક સ્થળને નુકસાન ન થાય તે માટે ખૂબ કાળજી લીધી, અને મસ્જિદની અંદર સુરક્ષા દળો દ્વારા કોઈ કાર્યવાહી કરવામાં આવી નહીં.
એસએસપીએ જણાવ્યું હતું કે લતીફ ભટ ૧૮ નવેમ્બર, ૨૦૨૫ ના રોજ લશ્કર-એ-તૈયબામાં જોડાયો હતો. તેણે કથિત રીતે કટ્ટરપંથી બન્યો હતો અને તેને જમ્મુ અને કાશ્મીરમાં શાંતિ, પર્યટન અને અર્થતંત્રને ખલેલ પહોંચાડવા માટે સરહદ પારથી સૂચનાઓ મળી રહી હતી.
કુલગામમાં મીર બજાર નજીક સીઆરપીએફ ચોકી પર ૧૧ નવેમ્બરના રોજ થયેલા હુમલામાં લતીફ ભટ મુખ્ય કાવતરાખોર હતો, જેમાં ત્રણ સૈનિકો ઘાયલ થયા હતા. ભારતીય સેના, જમ્મુ અને કાશ્મીર પોલીસના સ્પેશિયલ ઓપરેશન ગ્રુપ (SOG) અને સીઆરપીએફની સંયુક્ત ટીમો દ્વારા હાથ ધરવામાં આવેલા આતંકવાદ વિરોધી ઓપરેશનમાં તે માર્યો ગયો હતો.
(1:19 PM IST)









છેલ્લા 8 દિવસમાં સૌથી લોકપ્રિય 
