દિલ્હી : રાજધાની દિલ્હીમાં ચમત્કારિક કહી શકાય તેવી એક ઘટના સામે આવી છે, જ્યાં 13 વર્ષીય લક્ષિત નામના બાળકે મોતને નજીકથી જોઈને ફરીથી જીવનની મુખ્ય ધારામાં પ્રવેશ કર્યો છે. આઠ મહિના સુધી સતત ICU માં રહેવું, ત્રણ વખત હૃદયના ધબકારા થંભી જવા (કાર્ડિયાક અરેસ્ટ) અને ત્રણ મહિના સુધી વેન્ટિલેટરના આધારે શ્વાસ લેવા છતાં, લક્ષિતે હિંમત હારી નહીં. દિલ્હી મ્યુનિસિપલ કોર્પોરેશનની સ્વામી દયાનંદ હોસ્પિટલના ડોક્ટરોના અથાગ પ્રયત્નો અને લક્ષિતના મજબૂત મનોબળને કારણે આજે તે સ્વસ્થ થઈને પોતાના પગે ચાલી રહ્યો છે.

દુર્લભ બીમારીએ ઘેરી લીધું હતું લક્ષિતને

લક્ષિત 'ગુઇલેન-બેરે સિન્ડ્રોમ' (Guillain-Barre Syndrome) જેવી દુર્લભ ન્યુરોલોજીકલ બીમારીનો શિકાર બન્યો હતો. આ બીમારીમાં શરીરની રોગપ્રતિકારક શક્તિ પોતાની જ ચેતાઓ (Nerves) પર હુમલો કરે છે, જેના કારણે હાથ-પગમાં નબળાઈ આવે છે અને પરિસ્થિતિ ગંભીર બને તો લકવો પણ થઈ શકે છે. લક્ષિતની સ્થિતિ એટલી ગંભીર હતી કે તેને શ્વાસ લેવામાં તકલીફ પડતા તાત્કાલિક વેન્ટિલેટર પર મૂકવો પડ્યો હતો. લાંબા ગાળાની સારવાર માટે ડોક્ટરોએ તેની ગળામાં ટ્રેચેઓસ્ટોમી સર્જરી પણ કરવી પડી હતી.

ડોક્ટરોની ટીમની સતર્કતાથી મળ્યું નવું જીવન

બાળરોગ વિભાગના વડા ડૉ. સુરેન્દ્ર સિંહ બિષ્ટે જણાવ્યું કે, લક્ષિતને 10 વખત ઇન્ટ્રાવેનસ ઇમ્યુનોગ્લોબ્યુલિનના ડોઝ આપવામાં આવ્યા હતા. હોસ્પિટલના ડેપ્યુટી મેડિકલ સુપરિન્ટેન્ડેન્ટ ડૉ. પ્રશાંત જૈને જણાવ્યું હતું કે, સારવાર દરમિયાન લક્ષિતને ત્રણ વખત કાર્ડિયાક અરેસ્ટ આવ્યો હતો, પરંતુ ડોક્ટરો, નર્સો અને ટેકનિકલ ટીમે સેકન્ડોના ગાળામાં જ તેને ફરીથી જીવિત કરી દીધો હતો. લગભગ ચાર મહિના પછી લક્ષિતે થોડો ખોરાક લેવાનું શરૂ કર્યું અને ફિઝિયોથેરાપીના સઘન સત્ર બાદ તેના સ્નાયુઓમાં ફરી તાકાત આવી.

પ્રેરણા બની રહેલ લક્ષિતની સફળતા

આજે આઠ મહિના પછી જ્યારે લક્ષિત હોસ્પિટલમાંથી ડિસ્ચાર્જ થઈને પોતાના પગ પર ચાલી રહ્યો છે, ત્યારે તેના પરિવાર અને હોસ્પિટલ સ્ટાફ માટે આ કોઈ ચમત્કારથી ઓછું નથી. આ ઘટના એ સાબિત કરે છે કે જો સાચી સારવાર અને પરિવારનો સાથ મળે, તો ગમે તેવા દુર્લભ રોગોને પણ હરાવી શકાય છે. લક્ષિતની આ જીત માત્ર એક બાળકની સાજા થવાની કહાની નથી, પરંતુ તે લાખો લોકો માટે જીવવાની નવી આશા અને પ્રેરણા બની ગઈ છે.