કુવેત સિટી, તા.03 કુવેત સરકારે વિદેશીઓની નાગરિકતા અને રહેઠાણ અંગેના નિયમોમાં મોટો ફેરફાર કર્યો છે. દેશમાં વિઝિટ વિઝા પર આવતા લોકો માટે વિઝાને રેસિડેન્સી પરમિટ (કાયમી રહેઠાણ વિઝા) માં રૂપાંતરિત કરવા માટે હવે ૧૫૦ કુવેતી દિનારની ફી ફરજિયાત કરવામાં આવી છે. આ અંગેની સત્તાવાર માહિતી રવિવારે કુવેતના અધિકૃત ગેઝેટ 'કુવેત અલ-યૌમ' માં પ્રકાશિત કરવામાં આવી છે.
મંત્રાલયના નવા આદેશ અનુસાર, વિદેશી નાગરિકો માટે દેશમાં રોકાણ અને રોજગારની પ્રક્રિયાઓને વધુ વ્યવસ્થિત અને નિયંત્રિત કરવા માટે આ કડક પગલું લેવામાં આવ્યું છે. અગાઉ વિઝિટ વિઝામાંથી રેસિડેન્સી વિઝામાં ફેરફાર કરવાની પ્રક્રિયા સરળ હતી, પરંતુ હવે નવા નિયમ હેઠળ આ વિઝા સ્વિચિંગ માટે ૧૫૦ દિનાર ચૂકવવા પડશે.
જોકે, આ નવા નિયમમાં સામાન્ય જનતા અને કામદારો માટે એક રાહતના સમાચાર પણ છે. કુવેત મંત્રાલય દ્વારા સ્પષ્ટ કરવામાં આવ્યું છે કે ઘરેલુ કામદારો અને તેની સમકક્ષ વર્ગમાં આવતા લોકોને આ ૧૫૦ દિનારની ફીમાંથી સંપૂર્ણ મુક્તિ આપવામાં આવી છે. 
આ નવા નિયમો ગેઝેટમાં પ્રકાશિત થવાની સાથે જ તાત્કાલિક અસરથી અમલમાં આવી ગયા છે, અને સંબંધિત વિભાગોને આ અંગે કડક અમલીકરણ કરવાના આદેશો આપવામાં આવ્યા છે. કુવેત સરકારના આ નિર્ણયથી દેશમાં વિઝાના દુરુપયોગ પર રોક લાગશે અને શ્રમ બજારમાં વધુ પારદર્શિતા આવશે તેવી અપેક્ષા છે.