ગુવાહાટી, તા. ૧૧ : આસામના ગુવાહાટી નજીક દિગારુ વિસ્તારમાં આજે બુધવારે સવારે કોલકાતા–સાઈરંગ એક્સપ્રેસ પાટા પરથી ઊતરી ગઈ હતી. પ્રાથમિક અહેવાલો અનુસાર એન્જિન સહિત સાત એકમ પાટા પરથી ખડી પડ્યા છે. ઈજાગ્રસ્તોની ચોક્કસ સંખ્યા અંગે વધુ વિગતોની રાહ જોવાઈ રહી છે.

આસામમાં આજે વહેલી સવારે એક મોટી રેલવે દુર્ઘટના સર્જાઈ હોવાના સમાચાર મળ્યા છે. કોલકાતા અને મિઝોરમના સાઈરંગ વચ્ચે દોડતી એક્સપ્રેસ ટ્રેન ગુવાહાટીની બહાર આવેલા દિગારુ રેલવે સ્ટેશન નજીક પાટા પરથી ઊતરી ગઈ હતી.

પ્રાથમિક અહેવાલ અનુસાર સવારે આશરે ૬.૫૪ વાગ્યે આ દુર્ઘટના સર્જાઈ હતી. કેટલાક અહેવાલોમાં ટ્રેનના છ ડબા અને એન્જિન એમ કુલ સાત એકમ પાટા પરથી ઊતર્યાનું જણાવાયું છે, જ્યારે અન્ય અહેવાલોમાં સાત ડબા ગણાવવામાં આવ્યા છે.

દુર્ઘટનામાં અનેક મુસાફરોને ઈજા પહોંચી હોવાની પ્રાથમિક માહિતી મળી છે. જોકે ઈજાગ્રસ્તોની ચોક્કસ સંખ્યા, તેમની સ્થિતિ અને કોઈ જાનહાનિ થઈ છે કે કેમ તેની સત્તાવાર પુષ્ટિ હજુ પ્રાપ્ત થઈ નથી.

અકસ્મત પાછળ ટેક્નિકલ ખામી, પાટાની સ્થિતિ કે અન્ય કયું કારણ જવાબદાર છે તે પણ હજુ સ્પષ્ટ થયું નથી. ટ્રેનને થયેલા નુકસાન અને રેલવે વ્યવહાર ઉપર પડેલી અસરની વધુ વિગતો મેળવવામાં આવી રહી છે.

રેલવેની સત્તાવાર વિગતવાર યાદી પ્રાપ્ત થાય ત્યારબાદ ઈજાગ્રસ્તો અને દુર્ઘટનાના કારણ અંગે વધુ સ્પષ્ટતા થઈ શકશે.