તલગાજરડા, તા. ૧૮ ઑક્ટોબર : દેશભરમાં ગત શનિવારનો દિવસ અત્યંત દર્દનાક સાબિત થયો હતો, જેમાં વિવિધ રાજ્યોમાં બનેલી ગંભીર દુર્ઘટનાઓમાં કુલ ૪૦ જેટલા લોકોનાં કરુણ મોત નિપજ્યાં છે. આ હૃદયદ્રાવક ઘટનાઓ પર વિખ્યાત કથાકાર પૂ. મોરારિબાપુએ ઊંડો શોક વ્યક્ત કરીને દિવંગત આત્માઓને શ્રદ્ધાંજલિ પાઠવી છે અને પીડિત પરિવારજનોને કુલ ૬ લાખ રૂપિયાની આર્થિક સહાયતા રાશિ અર્પણ કરી છે.

વિવિધ દુર્ઘટનાઓની વિગતો અને સહાય:

 * કોલકાતા દુર્ઘટના: પશ્ચિમ બંગાળના કોલકાતા ખાતે દુર્ગા પૂજા નિમિત્તે એકત્રિત થયેલી ભીડમાં ભાગદોડ મચી જવાથી ૧૯ લોકોનાં દબાઈ જવાથી મોત થયા હતા. આ કરુણ ઘટનામાં માર્યા ગયેલા પ્રત્યેક મૃતકના પરિવારને રૂપિયા ૧૫,၀၀૦ લેખે કુલ રૂપિયા ૨,૮૫,૦૦૦ ની સહાયતા રાશિ અર્પણ કરવામાં આવી છે.

 * ગ્વાલિયર દુર્ઘટના: મધ્યપ્રદેશના ગ્વાલિયર ખાતે શીતળા માતાના મંદિર બહાર દર્શન કરવા એકઠા થયેલા શ્રદ્ધાળુઓ પર એક બેકાબૂ ટ્રક ફરી વળતા ૧૩ લોકોએ પોતાના પ્રાણ ગુમાવ્યા હતા. આ હતભાગીઓના પરિવારજનોને પણ રૂપિયા ૧૫,၀၀૦ લેખે કુલ રૂપિયા ૧,૯૫,૦૦૦ ની સહાયતા અપાઈ છે.

 * ગુજરાતમાં બોઈલર ફાટવાની ઘટનાઓ: ગુજરાતમાં પણ અકુદરતી મોતના બનાવો બન્યા હતા, જેમાં ભરૂચના વાગરા જીઆઈડીસી સ્થિત કારખાનામાં અને ત્યારબાદ ગાંધીનગરના છત્રાલમાં બોઈલર ફાટવાની દુર્ઘટનાઓમાં કુલ ૮ કામદારો (દુર્ઘટનાદીઠ ૪-૪)નાં કરુણ મોત નિપજ્યાં હતા. આ તમામ દિવંગતોના પરિવારજનો માટે કુલ રૂપિયા ૧,૨૦,૦૦૦ ની સહાય અર્પણ કરવામાં આવી છે.

મુંબઈ સ્થિત રામકથાના એક શ્રોતા દ્વારા ઉપરોક્ત તમામ દુર્ઘટનાના પીડિતો માટે કુલ મળીને રૂપિયા ૬ લાખ ની સહાયતા રાશિ મુખ્યમંત્રી રાહત ફંડમાં પહોંચાડવામાં આવી છે. પૂ. મોરારિબાપુએ તમામ દિવંગત થયેલા લોકોના દિવ્ય આત્માની શાંતિ અને તેમના નિર્વાણ માટે વિશેષ પ્રાર્થના કરી છે. તલગાજરડાથી જયદેવ માંકડ દ્વારા આ પ્રેસનોટ જારી કરવામાં આવી છે. (અહેવાલ - મુકેશ પંડિત)