તાલાલા (ગીર), તા.૧૫: ગીરની વિશ્વપ્રસિદ્ધ કેસર કેરીની સુગંધ હવે સાત સમુંદર પાર પહોંચવા લાગી છે, પરંતુ આ વખતે આ મીઠી સોગાત વિદેશમાં રહેતા ગુજરાતીઓના ખિસ્સા વધુ હળવા કરશે. ગલ્ફ દેશોમાં ચાલી રહેલી યુદ્ધ જેવી તણાવપૂર્ણ સ્થિતિ અને અસ્થિરતાની સીધી અસર ગીરની કેસર કેરીની નિકાસ પર પડી છે. ટ્રાન્સપોર્ટ અને એર કાર્ગોના ભાડામાં થયેલા તોતિંગ વધારાને કારણે નિકાસકારોએ મજબૂરીમાં ભાવમાં મોટો ઉછાળો કરવો પડ્યો છે.
તાલાલા માર્કેટિંગ યાર્ડ સ્થિત પેક હાઉસ ખાતેથી અમેરિકા અને યુકે માટે ૨૦૦૦ બોક્સનો પ્રથમ જથ્થો રવાના કરવામાં આવ્યો છે. આ કેરીઓને ખેડૂતો પાસેથી સીધી ખરીદી, ગ્રેડિંગ અને સફાઈ કર્યા બાદ અમદાવાદના બાવળા ખાતે 'રેડિયેશન પ્રોસેસ' માટે મોકલવામાં આવી છે. વિદેશી ધોરણો મુજબની આ પ્રક્રિયા બાદ જ કેરી વિદેશી બજારોમાં વેચવા માટે લાયક ઠરે છે.
 
વિદેશમાં કેટલો ભાવ વધ્યો? (૩ કિલોના બોક્સનો અંદાજિત ભાવ)
પરિવહન ખર્ચ વધવાને કારણે ગત વર્ષની સરખામણીએ ચાલુ વર્ષે ભાવમાં થયેલો ફેરફાર નીચે મુજબ છે:
દેશ    ગત વર્ષનો ભાવ    ચાલુ વર્ષનો ભાવ    અંદાજિત કિંમત (રૂપિયામાં)
યુકે (UK)    ૧૩ પાઉન્ડ    ૧૭ પાઉન્ડ    આશરે ₹૨,૧૫૨
અમેરિકા (USA)    ૨૫ ડોલર    ૩૨ ડોલર    આશરે ₹૨,૭૮૮
 
કેમ વધી રહ્યા છે ભાવ?
કેરીના ભાવ વધવા પાછળનું મુખ્ય કારણ ખેતી નહીં પણ ગ્લોબલ ટ્રાન્સપોર્ટેશન છે. ખાડી દેશોમાં યુદ્ધની સ્થિતિ હોવાથી વિમાની રૂટ બદલાયા છે અને ઇંધણના ભાવ વધતા એર કાર્ગોનું ભાડું સીધું બમણું થઈ ગયું છે. આથી, ગત વર્ષે જે બોક્સ બ્રિટનમાં ૧૬૪૮ રૂપિયામાં મળતું હતું, તે હવે ૨૧૫૨ રૂપિયામાં મળશે.
તાલાલા યાર્ડના સૂત્રોના જણાવ્યા અનુસાર, કેનેડા, ઓસ્ટ્રેલિયા અને યુરોપમાં નિકાસ ચાલુ છે, પરંતુ સાઉદી અરેબિયા, દુબઈ અને કતાર જેવા ગલ્ફ દેશોમાં સ્થિતિ ગંભીર હોવાથી ત્યાં નિકાસ પર મોટું સંકટ તોળાઈ રહ્યું છે. ગીરની કેસરની માંગ તો અકબંધ છે, પરંતુ મોંઘા ભાડાને કારણે આ વર્ષે કેરીનો સ્વાદ વિદેશીઓ માટે થોડો 'ખાટો' એટલે કે મોંઘો સાબિત થશે.