અયોધ્યા : અયોધ્યાના ભવ્ય રામ મંદિરમાં ભક્તો દ્વારા અપાયેલા દાનમાં કથિત મોટી ઉચાપત અને 'ચંદા ચોરી'ના ગંભીર વિવાદે હવે દેશભરમાં પ્રચંડ રાજકીય સ્વરૂપ ધારણ કરી લીધું છે. આમ આદમી પાર્ટી (AAP) ના રાષ્ટ્રીય સંયોજક અને દિલ્હીના પૂર્વ મુખ્યમંત્રી અરવિંદ કેજરીવાલે શુક્રવારે સાંસદ સંજય સિંહ સાથે અયોધ્યાની મુલાકાત લીધી હતી. હનુમાનગઢી અને રામ મંદિરમાં દર્શન કર્યા બાદ પત્રકારો સાથે વાતચીત કરતાં કેજરીવાલે ભારતીય જનતા પાર્ટી (BJP) અને કેન્દ્ર સરકાર પર આકરા પ્રહારો કર્યા હતા. તેમણે દાવો કર્યો કે, "જે લોકો ભગવાન રામના નામનો ઉપયોગ કરીને સત્તાના શિખરે પહોંચ્યા હતા, હવે રામ લલ્લા પોતે જ તેમને સત્તા પરથી હાંકી કાઢશે."

"૨૦૦ કરોડ રોકડા અને હીરા-ઝવેરાત ચોરાયા", કેજરીવાલના સનસનાટીપૂર્ણ આક્ષેપો

અરવિંદ કેજરીવાલે મંદિર ટ્રસ્ટ પર આક્ષેપોની ઝડી વરસાવતા કહ્યું કે, દેશ-વિદેશના કરોડો ભક્તોએ રામલલ્લાના ચરણોમાં જે કિંમતી વસ્તુઓ અર્પણ કરી હતી, તેમાંથી સોના-ચાંદીના ચંપલ, દાગીના, કિંમતી હીરા અને માળાઓ ગાયબ થઈ ગઈ છે. એટલું જ નહીં, મંદિરમાંથી આશરે ૨૦૦ કરોડ રૂપિયાની રોકડ રકમ અને ૨૦૦ કિલોગ્રામ પવિત્ર ચાંદીની પણ ચોરી થઈ છે. તેમણે આક્રોશ વ્યક્ત કરતા જણાવ્યું કે, "મેં આજે રામલલ્લાના દરબારમાં સંકલ્પ લીધો છે કે જ્યાં સુધી આ પવિત્ર ધામને લૂંટનારા રાક્ષસોને સજા નહીં મળે, ત્યાં સુધી અમે જંપીને નહીં બેસીએ."

નાના કર્મચારીઓની બલી ચડાવી મોટા માથાઓને બચાવવાનો ખેલ:

·         જુનિયર સ્ટાફની ધરપકડ: આ કેસમાં થયેલી એફઆઈઆર (FIR) અને ૮ લોકોની ધરપકડને કેજરીવાલે માત્ર આંખમાં ધૂળ નાખવા બરાબર ગણાવી છે. તેમણે આરોપ લગાવ્યો કે માત્ર જુનિયર સ્ટાફને પકડીને અસલી ગુનેગારો અને વરિષ્ઠ અધિકારીઓને બચાવવાના વ્યવસ્થિત પ્રયાસો થઈ રહ્યા છે.

·         SIT તપાસ માત્ર નાટક: કૌભાંડની તપાસ કરી રહેલી સ્પેશિયલ ઇન્વેસ્ટિગેશન ટીમ (SIT) ની વિશ્વસનીયતા પર સવાલ ઉઠાવતા તેમણે તેને કાયદેસર રીતે અમાન્ય ગણાવી હતી.

·         ટ્રસ્ટના મહાસચિવ પર સવાલ: શ્રી રામ જન્મભૂમિ તીર્થ ક્ષેત્ર ટ્રસ્ટના મહાસચિવ ચંપત રાયનું નામ લેતા કેજરીવાલે પૂછ્યું કે, "ચંપત રાય પાસે એવા કયા રહસ્યો છુપાયેલા છે કે ખુદ વડાપ્રધાન પણ તેમની સામે લાચાર દેખાઈ રહ્યા છે?"

વિવાદના કારણે દાનમાં મોટો ઘટાડો, જનતાનો વિશ્વાસ ડગમગ્યો

કેજરીવાલે મીડિયાના અહેવાલોને ટાંકીને દાવો કર્યો હતો કે આ કથિત કૌભાંડ અને વિવાદ બહાર આવ્યા બાદ રામ મંદિરમાં ભક્તો દ્વારા અપાતા દૈનિક દાનમાં મોટો કડાકો બોલાયો છે. જે મંદિરમાં રોજનું સરેરાશ ૧૨ થી ૧૪ લાખ રૂપિયાનું દાન આવતું હતું, તે હવે ઘટીને માંડ ૧ લાખ રૂપિયાની નીચે પહોંચી ગયું છે, જે દર્શાવે છે કે આ ઘટનાથી કરોડો હિન્દુઓની આસ્થા અને જાહેર વિશ્વાસને ઊંડો આઘાત લાગ્યો છે. તેમણે દેશના નાગરિકોને અપીલ કરી કે કાયદો તેનું કામ કરે કે ન કરે, પરંતુ સમાજે આવા 'ચંદા ચોરો' અને તેમને આશ્રય આપનારાઓનો સામાજિક બહિષ્કાર કરવો જોઈએ, નહિતર આપણે પણ આ પાપના ભાગીદાર બનીશું. આ મુલાકાત બાદ ઉત્તર પ્રદેશના રાજકારણમાં ભારે ગરમાવો આવી ગયો છે.