જમ્મુ: કાશ્મીરમાં પ્રાણી-માનવ સંઘર્ષમાં હવે કૂતરા અને બિલાડીના કરડવાના કિસ્સાઓ ઉમેરાઈ રહ્યા છે. સૌથી ચિંતાની વાત એ છે કે કાશ્મીરમાં કાશ્મીરીઓને કૂતરા કરતા બિલાડીઓ વધુ કરડી રહી છે.

​અધિકારીઓએ જણાવ્યું કે ગયા વર્ષે શ્રીનગરમાં શ્રી મહારાજા હરિ સિંહ (એસએમએચએસ - SMHS) હોસ્પિટલના એન્ટી-રેબીઝ ક્લિનિકમાં ૧૭,૧૨૭ પીડિતોએ સારવાર લીધી હતી, જેમાં મોટાભાગના કૂતરા અને બિલાડીના કરડવાના કિસ્સા હતા.

​એક અધિકારીએ વિગતો શેર કરતા જણાવ્યું કે સમગ્ર ખીણમાં કૂતરાઓના વ્યાપને કારણે માનવ-કૂતરા વચ્ચેનો સંઘર્ષ વધ્યો છે, જેના લીધે આ વિસ્તારમાં કૂતરા કરડવાના કેસમાં વધારો થયો છે. જ્યારે બિલાડીઓને હવે ઘરમાં પાળવામાં આવી રહી છે, જેના કારણે બિલાડીના કરડવાના કિસ્સાઓ સામે આવી રહ્યા છે.

​અધિકારીએ કહ્યું હતું કે છેલ્લા એક વર્ષમાં એટલે કે એપ્રિલ ૨૦૨૫ થી માર્ચ ૨૦૨૬ સુધી એઆરસી એસએમએચએસ (ARC SMHS) હોસ્પિટલમાં ૧૭,૧૨૭ કેસ આવ્યા હતા, જેમાં કૂતરા કરડવાના ૭,૩૦૭ કિસ્સા, બિલાડી કરડવાના ૯,૧૪૪ કિસ્સા અને અન્ય પ્રાણીઓના કરડવાના ૬૭૬ કિસ્સા સામેલ છે.

​તેમણે કહ્યું કે અમને દર મહિને એન્ટી-રેબીઝમાં પ્રાણીઓના કરડવાના લગભગ ૧૫૦૦ કેસ મળે છે અને છેલ્લા એક વર્ષમાં લગભગ ૧૭,૦૦૦ કેસ નોંધાયા છે. તેમનું કહેવું હતું કે ૧૭,૧૨૭ કેસનો આ આંકડો છેલ્લા એક દાયકામાં નોંધાયેલો સૌથી વધુ છે, જે આ સમસ્યાના તાત્કાલિક નિરાકરણની જરૂરિયાત પર ભાર મૂકે છે.

​આંકડાકીય વિગતો પરથી જાણવા મળે છે કે છેલ્લા એક વર્ષમાં શ્રીનગરમાં ૧૪,૫૫૪, બડગામમાં ૭૫૧, બારામુલ્લામાં ૨૬૬, કુપવાડામાં ૨૩૧, બાંદીપોરામાં ૩૦૪, ગાંદરબલમાં ૨૩૫, પુલવામામાં ૧૫૨, શોપિયાંમાં ૯૬, કુલગામમાં ૯૯, બડગામમાં ૧૧૧ અને અન્ય જિલ્લાઓમાંથી ૩૨૮ કેસ નોંધાયા છે.

​એક પશુ નિષ્ણાતે જણાવ્યું કે બિલાડીઓ પણ કૂતરાની જેમ જ રેબીઝ (હડકવા) ફેલાવે છે અને બિલાડી કરડવાના કેસો વધી રહ્યા છે, જેથી લોકોએ આ બાબતે સાવચેતી રાખવાની જરૂર છે. તેમણે કહ્યું કે ખાસ કરીને કોવિડ સમયગાળા પછી બિલાડીઓને પાલતુ પ્રાણી તરીકે રાખવાનું ચલણ વધ્યું છે, પરંતુ ઘણા કિસ્સાઓમાં માલિકો રસીકરણ, ડીવોર્મિંગ (કૃમિનાશક દવા), સમયસર સારવાર અને સ્વચ્છતા જેવી બાબતોનું પાલન કરતા નથી.

​માહિતી મુજબ કાશ્મીરમાં કૂતરું કરડવું એ જાહેર સ્વાસ્થ્ય માટે એક ગંભીર ચિંતાનો વિષય છે, જ્યાં હજારો લોકો પ્રાણીઓ, ખાસ કરીને કૂતરાના કરડવાનો શિકાર બને છે અને કેટલાકમાં રેબીઝ (હડકવા) પણ જોવા મળે છે. *