બેંગલુરુ, તા.૨૨: કર્ણાટક પબ્લિક સર્વિસ કમિશન (KPSC) માં સરકારી નોકરીઓની ભરતી પ્રક્રિયા દરમિયાન સામે આવેલા ભ્રષ્ટાચાર અને ગેરરીતિના આક્ષેપોને પગલે રાજ્યના રાજકારણમાં મોટો ગરમાવો આવી ગયો છે. કર્ણાટકના (CM) ડી.કે. શિવકુમારે આ મુદ્દે અત્યંત આકરૂં વલણ અપનાવતા ધમાકેદાર નિવેદન આપ્યું છે. તેમણે ખુલ્લેઆમ આક્રોશ વ્યક્ત કરતા જણાવ્યું હતું કે, "હું તો KPSC ને બંધ જ કરી દેવા માગું છું, કારણ કે ત્યાં અનેક કૌભાંડીઓ અને ભ્રષ્ટ લોકો ઘૂસી ગયા છે!"

આયોગમાં સરકારી નોકરીના ઉમેદવારો પાસેથી પૈસા પડાવવાના અને ભ્રષ્ટાચારના બહુચર્ચિત આક્ષેપો સામે આવ્યા બાદ ડેપ્યુટી મુખ્યમંત્રીનું આ નિવેદન સામે આવ્યું છે. શિવકુમારે કહ્યું કે, સંસ્થાની છબી અને કાર્યપ્રણાલી એટલી હદે બગડી ચૂકી છે કે આખી સિસ્ટમમાં તાત્કાલિક અને મોટા પાયે ફેરફારો કરવાની જરૂર છે. લાખો યુવાનો પોતાના ભવિષ્ય માટે રાત-દિવસ મહેનત કરે છે ત્યારે આવી સંસ્થાઓમાં થતી ગેરરીતિ તેમના ભવિષ્ય સાથે મોટો ખિલવાડ છે.

ભરતી પ્રક્રિયાને પારદર્શક બનાવવા માટે સરકાર લાવી શકે છે નવા કાયદા

KPSC માં વધતા જતા વિવાદો વચ્ચે કર્ણાટક સરકાર હવે ભરતી પરીક્ષાઓને સંપૂર્ણ પારદર્શક બનાવવા માટે વિકલ્પો શોધી રહી છે. શિવકુમારે સંકેત આપ્યો હતો કે રાજ્યમાં યોગ્ય અને ગુણવત્તાસભર ઉમેદવારોની નિષ્પક્ષ પસંદગી થાય તે માટે વર્તમાન વ્યવસ્થામાં ધરખમ સુધારા કરવામાં આવશે અથવા નવી સ્વતંત્ર બોડી તૈયાર કરવામાં આવશે. ડેપ્યુટી સીએમ ના આ નિવેદન બાદ રાજ્યના રાજકીય વર્તુળોમાં ભારે ચર્ચા જાગી છે અને વિપક્ષે પણ આ મુદ્દે સરકાર સમક્ષ કડક પગલાં લેવાની માંગ કરી છે.