બેંગલુરુ : બેંગલુરુના પર્યાવરણ, ખુલ્લા મેદાનો અને ઐતિહાસિક બગીચાઓ પર તોળાતું મોટું સંકટ હાલ પૂરતું ટળી ગયું છે. ચોમાસુ સત્રમાં કોઇપણ જાતની ચર્ચા વિના પસાર કરાયેલા અત્યંત વિવાદિત 'ગવર્નમેન્ટ પાર્ક્સ (પ્રીઝર્વેશન) એમેન્ડમેન્ટ બિલ, ૨૦૨૬' સામે નાગરિકો, પર્યાવરણવિદો અને વિપક્ષના ઉગ્ર આક્રોશ બાદ ગુરુવારે યોજાયેલી કેબિનેટ બેઠકમાં કર્ણાટક સરકારે આ બિલ પાછું ખેંચવાનો ઐતિહાસિક નિર્ણય લીધો છે.

સરકારે અગાઉ આ વિધેયકમાં એવો સુધારો કર્યો હતો કે જાહેર માળખાકીય સુવિધાઓ અને 'ટનલ રોડ' જેવા પ્રોજેક્ટ્સ માટે રાજ્યના કોઈપણ સરકારી બગીચા કે પાર્કની ૫ ટકા જમીન વેચાણ, લીઝ કે ટ્રાન્સફર કરી શકાશે. આ નિર્ણય બહાર આવતા જ બેંગલુરુના પ્રતિષ્ઠિત લાલબાગ બોટાનિકલ ગાર્ડન અને કબન પાર્ક જેવા ગ્રીન વિસ્તારો કાયમ માટે છીનવાઈ જવાની ભીતિ સેવાઈ રહી હતી. જેને પગલે શહેરના નાગરિકો, વિપક્ષી પક્ષો અને પર્યાવરણ પ્રેમીઓએ રસ્તા પર ઉતરીને ભારે વિરોધ પ્રદર્શનો શરૂ કર્યા હતા.

આ વિરોધના વંટોળ વચ્ચે કોંગ્રેસ હાઇકમાન્ડ અને રાહુલ ગાંધીએ પણ આ મામલે હસ્તક્ષેપ કરીને જનતાના મંતવ્યોને ધ્યાનમાં લેવાની સલાહ આપી હતી. ત્યારબાદ કેબિનેટ બેઠક પૂર્ણ થયા પછી નાયબ મુખ્યમંત્રી જી. પરમેશ્વર અને મુખ્યમંત્રી ડી.કે. શિવકુમારે સત્તાવાર જાહેરાત કરતા જણાવ્યું હતું કે, "લોકશાહીમાં જનતાનો અવાજ જ સર્વોપરી છે. સાર્વજનિક ભાવનાઓ અને જનમતનો આદર કરીને સરકારે આ બિલ પાછું ખેંચવાનો નિર્ણય લીધો છે. હવે આ વિધેયકને જાહેર જનતા સમક્ષ ચર્ચા માટે મુકાશે અને નાગરિકોના સૂચનો ઉમેર્યા બાદ જ ભવિષ્યમાં નવા સુધારા સાથે ગૃહમાં લાવવામાં આવશે." સરકારે સ્વીકારેલી આ હારને પર્યાવરણપ્રેમીઓએ જનતાની મોટી જીત ગણાવી છે.