નવી દિલ્હી  : ભાજપનાં સાંસદ અને અભિનેત્રી કંગના રનૌતે કોંગ્રેસનાં વરિષ્ઠ નેતા સોનિયા ગાંધી અને ગાંધી પરિવાર ઉપર ગંભીર પ્રશ્નો ઉઠાવતાં રાજકીય ચર્ચા શરૂ થઈ છે.

સોશિયલ મીડિયા ઉપર વર્ષ ૧૯૮૧ના સમયગાળાનો ગાંધી પરિવારનો એક જૂનો વીડિયો ફરી સામે આવ્યા બાદ કંગનાએ મેનકા ગાંધી સાથે થયેલા વ્યવહાર અંગે સવાલ ઉઠાવ્યા હતા.

કંગનાએ જણાવ્યું હતું કે, સંજય ગાંધીના અવસાન બાદ નાની ઉંમરે વિધવા બનેલાં મેનકા ગાંધીને પરિવાર તરફથી યોગ્ય લાગણી અને સહારો મળ્યો હતો કે કેમ તે વિચારવા જેવી બાબત છે.

તેમણે પોતાની ફિલ્મ 'ઇમરજન્સી' બનાવતી વખતે ગાંધી પરિવારના ઇતિહાસનો વિસ્તૃત અભ્યાસ કર્યો હોવાનું પણ જણાવ્યું હતું.

કંગનાએ સંજય ગાંધીના વિમાન અકસ્માત, ઈન્દિરા ગાંધીની હત્યા અને રાજીવ ગાંધીની હત્યા બાદ સોનિયા ગાંધીના રાજકીય પ્રભાવ અંગે પણ સવાલ કર્યા હતા. જોકે સોનિયા ગાંધીને આ મૃત્યુઓ સાથે જોડતા કોઈ પુરાવા કંગનાએ રજૂ કર્યા નથી.

સોનિયા ગાંધીની આત્મકથા 'બિલોંગિંગ : અ જર્ની ઓફ લવ' પ્રકાશિત થતાં જ આ નિવેદનો સામે આવ્યાં છે. મેનકા ગાંધી અને ગાંધી પરિવાર વચ્ચેના વર્ષો જૂના મતભેદો ફરી ચર્ચાના કેન્દ્રમાં આવ્યા છે.