મુંબઈ:  બોલિવૂડ ક્વીન અને સાંસદ કંગના રનૌત તેની આગામી હાઈ-વોલ્ટેજ ફિલ્મ "ભારત ભાગ્ય વિધાતા" ના પ્રમોશન દરમિયાન ફરી એકવાર પોતાના આકરા અને સ્પષ્ટવક્તા અંદાજને કારણે ચર્ચામાં આવી છે. આ ફિલ્મમાં તેની સાથે મુખ્ય ભૂમિકા ભજવી રહેલી અભિનેત્રીઓ ગિરિજા ઓક અને સ્મિતા તાંબે સાથેના એક ઈન્ટરવ્યુમાં, કંગનાએ સમાજ અને કોર્પોરેટ જગત સામે વર્કિંગ માતાઓની સુવિધા અંગે એક મોટો સામાજિક પ્રશ્ન ઉઠાવ્યો છે. સહ-અભિનેત્રી સ્મિતા તાંબેએ જ્યારે શૂટિંગ દરમિયાન તેની પુત્રીની ચિંતા અને ૨૪ કલાક સક્રિય રહેવાની માતૃત્વની ફરજ વિશે વાત કરી, ત્યારે કંગનાએ કામકાજના સ્થળો પર મહિલાઓ માટે પૂરતી વ્યવસ્થા ન હોવા અંગે ગંભીર નારાજગી વ્યક્ત કરી હતી.

ઇન્ટરવ્યુ દરમિયાન કંગનાએ સેટ પર સ્મિતાની દીકરીની હાજરીનો ઉલ્લેખ કરતા કહ્યું કે, આપણે કાર્યસ્થળો પર પ્રાર્થના રૂમ અને અન્ય અદ્યતન સુવિધાઓ વિશે મોટી-મોટી વાતો કરીએ છીએ, પરંતુ નોકરી કરતી મહિલાઓના માસૂમ બાળકો માટે અલગ 'પ્લે-રૂમ' કેમ નથી હોતા? પોતાના અંગત અવલોકનો શેર કરતા તેણે ઉમેર્યું કે, સરકારી નોકરીઓમાં મહિલાઓને છ મહિનાની મેટરનિટી લીવ તો મળી જાય છે, પરંતુ રજા પૂરી થયા પછી જ્યારે તેઓ પરત ફરે છે ત્યારે બાળકને સાથે રાખવાની કોઈ સગવડ હોતી નથી. જો સરકાર અનામત અને વિવિધ યોજનાઓ દ્વારા મહિલાઓને કાર્યબળમાં આગળ લાવવા માંગતી હોય, તો પાયાની સુવિધાઓ વિના મહિલાઓએ હંમેશા પરિવાર અથવા કારકિર્દીમાંથી કોઈ એકની જ પસંદગી કરવી પડશે, જે અન્યાયી છે.

મનોજ ટાપરિયા દ્વારા લિખિત અને દિગ્દર્શિત ફિલ્મ "ભારત ભાગ્ય વિધાતા" આગામી ૧૨ જૂને સિનેમાઘરોમાં રિલીઝ થવા જઈ રહી છે. કંગના રનૌતના પ્રોડક્શન હાઉસ મણિકર્ણિકા ફિલ્મ્સ અને પેન સ્ટુડિયોના બેનર હેઠળ બનેલી આ ફિલ્મ ૨૦૦૮ના મુંબઈ આતંકવાદી હુમલાની ભયાનક પૃષ્ઠભૂમિ પર આધારિત છે, જેમાં કામા હોસ્પિટલના સ્ટાફે દર્દીઓના જીવ બચાવવા માટે પોતાના પ્રાણ પંચે લગાવ્યા હતા. એશા ડે, પ્રિયા બેર્ડે અને અમૃતા નામદેવ જેવા કલાકારોથી સજ્જ આ ફિલ્મ બોક્સ ઓફિસ પર ધૂમ મચાવવા સજ્જ છે, ત્યારે કંગનાના આ નિવેદને દેશભરમાં વર્કિંગ વુમનના અધિકારોની ચર્ચાને નવી હવા આપી છે.