નવી દિલ્હી : પશ્ચિમ બંગાળ વિધાનસભા ચૂંટણીના પરિણામો બાદ હવે રાજકીય લડાઈ આંતરરાષ્ટ્રીય પ્લેટફોર્મ સુધી પહોંચી ગઈ છે. શિવસેના (UBT) ના નેતા સંજય રાઉતે અમેરિકી રાષ્ટ્રપતિ ડોનાલ્ડ ટ્રમ્પને સંબોધીને સોશિયલ મીડિયા પર એક પોસ્ટ કરી, જેના કારણે ભાજપ અને વિપક્ષ વચ્ચે શાબ્દિક યુદ્ધ છેડાયું છે. ભાજપે સંજય રાઉતને "ભારતીય રાજનીતિના જોકર" ગણાવીને એવો આરોપ લગાવ્યો છે કે તેઓ અને રાહુલ ગાંધી દેશને બદનામ કરવાનું કામ કરી રહ્યા છે.
સંજય રાઉતે તેમની પોસ્ટમાં ડોનાલ્ડ ટ્રમ્પ દ્વારા વડાપ્રધાન મોદીને પાઠવવામાં આવેલી કથિત શુભેચ્છાઓ પર સવાલ ઉઠાવ્યા હતા. રાઉતે દાવો કર્યો હતો કે ભારતની ફેડરલ ડેમોક્રસીમાં ચૂંટણી એ અમારો આંતરિક વિષય છે અને કોઈપણ બાહ્ય સમર્થન અકાળે અને અયોગ્ય છે. તેમણે બંગાળની ચૂંટણીમાં ધાક-ધમકી અને સિસ્ટમેટિક દબાણના આક્ષેપો કરતા જણાવ્યું કે, ચૂંટણી પંચની ભૂમિકા નિષ્પક્ષ રહી નથી અને કેન્દ્રીય દળોનો ઉપયોગ ડર ફેલાવવા માટે કરવામાં આવ્યો હતો.
ભાજપના પ્રવક્તા શહઝાદ પૂનાવાલાએ આ પોસ્ટનો આકરો જવાબ આપતા એક વીડિયો જાહેર કર્યો છે. પૂનાવાલાએ કહ્યું કે, "જ્યારે પણ ચૂંટણીના પરિણામો વિરોધ પક્ષની તરફેણમાં નથી આવતા, ત્યારે તેઓ બંધારણીય સંસ્થાઓ પર સવાલો ઉઠાવવા લાગે છે." તેમણે ઉમેર્યું કે સમગ્ર વિશ્વ ભારતીય લોકશાહીના વખાણ કરી રહ્યું છે, ત્યારે વિપક્ષી નેતાઓ ઘરેલું રાજકીય લડાઈ માટે વિદેશી નેતાઓ પાસે ખોટા નેરેટિવ ફેલાવી રહ્યા છે.
સંજય રાઉતે મમતા બેનર્જી દ્વારા ઉઠાવવામાં આવેલા મુદ્દાઓનો હવાલો આપીને લોકશાહીની વિશ્વસનીયતા પર ભાર મૂક્યો હતો. બીજી તરફ, ભાજપે આક્ષેપ કર્યો છે કે વિપક્ષ મોદી વિરોધમાં આંધળો બનીને હવે દેશના ગૌરવને પણ ઠેસ પહોંચાડી રહ્યો છે. અત્યારે સોશિયલ મીડિયા પર આ 'ટ્વિટર વોર' જોર પકડતી જોવા મળી રહી છે.