નાગપુર : નાગપુરના MIDC પોલીસ સ્ટેશનના અધિકારક્ષેત્ર હેઠળ આવતા વાનાડોંગરી વિસ્તારમાં એક સનસનાટીભરી ઘટના સામે આવી છે, જેમાં 4 થી 5 શખ્સોનું એક જૂથ દિવસ-દહાડે જ્વેલરીની દુકાનમાં ઘૂસી ગયું હતું અને બંદૂકની અણીએ લાખો રૂપિયાના સોના-ચાંદીના ઘરેણાંની લૂંટ ચલાવી હતી.

પોલીસના જણાવ્યા અનુસાર, શુભમ હાડગે મહાજનવાડી સ્થિત 'ધોમને જ્વેલર્સ'માં કામ કરી રહ્યો હતો ત્યારે કેટલાક બદમાશો મોટરસાયકલ પર આવ્યા અને દુકાનમાં ઘૂસી ગયા હતા. આરોપીઓએ હાડગે પર પિસ્તોલ તાકી જાનથી મારી નાખવાની ધમકી આપી સોના-ચાંદીના ઘરેણાં થેલીમાં ભરી લીધા હતા.

જ્યારે આરોપીઓ મોટરસાઇકલ પર ભાગવાનો પ્રયાસ કરી રહ્યા હતા, ત્યારે હાડગેએ હિંમત દાખવી ભાગતા બદમાશોની બાઈક પકડી લીધી હતી. જોકે, આરોપીઓ અટક્યા નહીં અને તેને થોડે દૂર સુધી ઘસડી ગયા હતા, જેના કારણે તેને ગંભીર ઈજાઓ થઈ હતી.

ઘટના બાદ સ્થાનિક લોકોએ ઘાયલ કર્મચારીને હોસ્પિટલમાં દાખલ કર્યો હતો, અને હાલ પોલીસે આ મામલે ઊંડાણપૂર્વક તપાસ શરૂ કરીને ફરાર આરોપીઓની શોધખોળના ચક્રો ગતિમાન કર્યા છે.