નવી દિલ્હી, ૨૧ જૂન: કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ સાથે 'કોકરોચ જનતા પાર્ટી' (CJP) દ્વારા દિલ્હીના જંતર-મંતર પર શરૂ કરાયેલું પ્રદર્શન શનિવાર સુધી યથાવત રહ્યું છે, જેમાં પક્ષના પ્રમુખ અભિજીત દિપકે અને તેમના હજારો સમર્થકોએ થાળી વગાડી સરકાર સામે મોરચો માંડ્યો છે.

વિરોધ મંચ પરથી અભિજીત દિપકેએ દિલ્હી પોલીસ પર ગંભીર આક્ષેપ કરતા કહ્યું હતું કે, પ્રદર્શનકારીઓને પીવાનું પાણી, વીજળી અને શૌચાલય જેવી પાયાની સુવિધાઓથી વંચિત રાખવામાં આવી રહ્યા છે. તેમણે પોલીસ અધિકારીઓને સીધો પ્રશ્ન કર્યો હતો કે શું આ અમાનવીય આદેશ વડાપ્રધાન, ગૃહમંત્રી કે મુખ્યમંત્રી દ્વારા આપવામાં આવ્યો છે?

પોલીસ દ્વારા નક્કી કરાયેલી સમયમર્યાદા સમાપ્ત થયા છતાં, CJP સમર્થકો રાત્રિના અંધકારમાં પણ સૂત્રોચ્ચાર કરી રહ્યા છે. દીપકેએ પોલીસને વિનંતી કરી હતી કે તેઓ માત્ર આદેશ આપનાર વ્યક્તિનું નામ જણાવે, જેથી તેઓ પોતે તે નેતા સમક્ષ પોતાની વાત રજૂ કરી શકે અને પોલીસ કર્મચારીઓને કોઈ મુશ્કેલી ન પડે તે જોવાની જવાબદારી તેમની રહેશે.

આ વિરોધ પ્રદર્શન પાછળ લાંબા સમયથી ચાલી રહેલી શૈક્ષણિક નીતિઓનો વિવાદ મુખ્ય કારણ હોવાનું મનાઈ રહ્યું છે. હાલમાં તંત્ર દ્વારા પ્રદર્શન સ્થળ પર સખત સુરક્ષા વ્યવસ્થા કરવામાં આવી છે. હવે પોલીસ આ મામલે આગળ શું પગલાં લે છે અને આ આંદોલન કેટલો સમય ચાલશે તે જોવું મહત્વપૂર્ણ રહેશે.