નવી દિલ્હી : ઈરાકના બગદાદ ખાતે યોજાયેલી ઇસ્લામી સહયોગ સંગઠન (OIC) ની વિદેશ મંત્રીઓની ૫૨મી બેઠકમાં પાકિસ્તાન દ્વારા રજૂ કરવામાં આવેલા ભારત વિરોધી પ્રસ્તાવ સામે ભારતે અત્યંત આક્રમક અને સ્પષ્ટ વલણ અપનાવ્યું છે. ભારતીય વિદેશ મંત્રાલયે પાકિસ્તાનને અરીસો બતાવતા કડક શબ્દોમાં જણાવ્યું છે કે OIC ને ભારતની આંતરિક બાબતોમાં ટિપ્પણી કરવાનો કોઈ જ અધિકાર નથી અને આ સંગઠન પાકિસ્તાનના સંકુચિત એજન્ડાનું રમકડું બનવાનું બંધ કરે.

વિદેશ મંત્રાલય દ્વારા જારી કરાયેલા નિવેદનમાં સ્પષ્ટ કરવામાં આવ્યું છે કે OIC ની બેઠકમાં ભારત વિરુદ્ધ કરવામાં આવેલી વાતો પક્ષપાતભરી, દુર્ભાવનાપૂર્ણ અને પાયાવિહોણી છે. સંગઠન ફરી એકવાર પાકિસ્તાનના કટ્ટરપંથી એજન્ડાનો ભોગ બન્યું છે, જે અત્યંત નિરાશાજનક છે. ભારતે ભારપૂર્વક જણાવ્યું છે કે કેન્દ્રશાસિત પ્રદેશો જમ્મુ-કાશ્મીર અને લદ્દાખ હંમેશાથી ભારતના અભિન્ન અને અવિભાજ્ય અંગ રહ્યા છે અને રહેશે. કલમ ૩૭૦ નાબૂદ થયા બાદ જમ્મુ-કાશ્મીરમાં થયેલા આર્થિક વિકાસ, પ્રવાસન અને ઉત્તમ કનેક્ટિવિટીના કારણે ત્યાંના સામાન્ય નાગરિકોના જીવનમાં સકારાત્મક બદલાવ આવ્યો છે, જેને કોઈ રાજકીય દુષ્પ્રચાર બદલી શકતો નથી.

સાથે જ, ભારતે પાકિસ્તાનના તાબા હેઠળના કાશ્મીર અને પાકિસ્તાનની અંદર જ લઘુમતીઓ પર થઈ રહેલા અત્યાચારો, માનવાધિકાર ઉલ્લંઘન અને આર્થિક અસ્થિરતા મુદ્દે પણ પાકિસ્તાનને ઘેરી લીધું હતું. ભારતે જણાવ્યું હતું કે પાકિસ્તાન પોતાની આંતરિક નિષ્ફળતાઓ અને સાંપ્રદાયિક હિંસાથી દુનિયાનું ધ્યાન ભટકાવવા માટે આવા ખોટા પ્રસ્તાવ રજૂ કરી રહ્યું છે. પાકિસ્તાનના હાથનું રમકડું બની ચૂકેલા OIC ની વિશ્વસનીયતા અને અખંડતા પર તેના આવા પક્ષપાતી વલણને કારણે ગંભીર સવાલો ઊભા થઈ રહ્યા છે.