મુંબઈ:  પશ્ચિમ એશિયામાં ચાલી રહેલા ભયાનક યુદ્ધ અને તણાવની સીધી અસર હવે વૈશ્વિક બજાર પર દેખાઈ રહી છે, જેના કારણે દુનિયાભરમાં પેટ્રોલિયમ પેદાશો અને એલપીજી ગેસની ભારે અછત સર્જાઈ છે. ભારતમાં પણ તાજેતરમાં પેટ્રોલ અને ડીઝલના ભાવમાં પ્રતિ લીટર ₹૩થી વધુનો તોતિંગ વધારો ઝીંકાયો છે. આ આંતરરાષ્ટ્રીય ઉર્જા સંકટને પહોંચી વળવા માટે વડાપ્રધાન નરેન્દ્ર મોદીએ દેશની જનતાને એક ખાસ અપીલ કરી છે. પીએમ મોદીએ લોકોને વિનંતી કરી છે કે તેઓ પોતાના ખાનગી પેટ્રોલ-ડીઝલના વાહનોનો વપરાશ ઘટાડે અને બને ત્યાં સુધી પબ્લિક ટ્રાન્સપોર્ટ, ખાસ કરીને મેટ્રો ટ્રેનનો ઉપયોગ કરે જેથી દેશના ઈંધણ અને વિદેશી હૂંડિયામણની બચત થઈ શકે.

વડાપ્રધાનની આ રાષ્ટ્રહિતની અપીલને હવે બોલિવૂડ તરફથી પણ જોરદાર સમર્થન મળી રહ્યું છે. હિન્દી સિનેમાના દિગ્ગજ અભિનેતા જેકી શ્રોફ (જગ્ગુ દાદા) નો એક વીડિયો સોશિયલ મીડિયા પર વાવાઝોડાની જેમ વાયરલ થઈ રહ્યો છે, જેમાં તેઓ પીએમ મોદીની આ ઝુંબેશની પડખે ઉભેલા જોવા મળે છે. મુંબઈમાં આયોજિત એક કાર્યક્રમ દરમિયાન જ્યારે મીડિયાના પત્રકારોએ તેમને પૂછ્યું કે, પીએમ મોદીની અપીલ બાદ દેશના લોકો પેટ્રોલ-ડીઝલના વાહનો કેમ ઓછા ચલાવી રહ્યા છે, ત્યારે પોતાના આગવા અને કડક અંદાજ માટે જાણીતા જેકી શ્રોફ પત્રકારો પર જ ભડકી ગયા હતા.

વાયરલ વીડિયોમાં જેકી શ્રોફ મીડિયાને સણસણતો જવાબ આપતા કહે છે કે, "ગાડી ઓછી ચલાવીને શું તમે ભારત દેશ પર કોઈ ઉપકાર કરી રહ્યા છો? ઓછી ગાડીઓ ચલાવો ભાઈ! આજે આખી દુનિયા ભારે મુશ્કેલીમાં જીવી રહી છે, છતાં આપણું ભારત હજુ પણ મુક્તપણે ખાઈ-પી રહ્યું છે અને આનંદ માણી રહ્યું છે. જો આપણને પેટ્રોલ અને ગેસ સમયસર મળી રહ્યા છે, તો પછી શું કામ રડી રહ્યા છો? પીએમ મોદી જે કહે છે તે બરાબર જ છે, એમનું સાંભળો અને એવું કરો." આટલું કહીને જગ્ગુ દાદા ત્યાંથી રવાના થઈ ગયા હતા. જેકી શ્રોફના આ દેશભક્તિ સભર નિવેદનની પ્રશંસા થઈ રહી છે અને દેશવાસીઓને પણ આ સંકટના સમયે મેટ્રો અને સાર્વજનિક વાહનોનો ઉપયોગ કરી દેશ હિતમાં ભાગીદાર બનવા વિનંતી કરાઈ રહી છે.