રોમ:ઇટાલીના વડાપ્રધાન જ્યોર્જિયા મેલોની હાલમાં તેમના એક સોશિયલ મીડિયા પોસ્ટને કારણે વૈશ્વિક સ્તરે ચર્ચાનું કેન્દ્ર બન્યા છે. મેલોનીએ સોશિયલ મીડિયા પ્લેટફોર્મ X પર પરંપરાગત 'ઝુમકા' પહેરીને પોતાની એક આકર્ષક તસવીર શેર કરી છે. આ ફોટોની સાથે તેમણે લખેલું કેપ્શન એવા લોકો માટે એક સ્પષ્ટ સંદેશ માનવામાં આવી રહ્યો છે જેઓ ઇટાલીની સરકારને સ્થિરતા અને સ્વતંત્રતાના પાઠ ભણાવવાનો પ્રયાસ કરી રહ્યા છે. જોકે, તેમણે આ પોસ્ટમાં કોઈ ચોક્કસ વ્યક્તિ કે સંસ્થાનું નામ લીધું નથી.

ટીકાકારોને સ્પષ્ટ સંદેશ:

પોતાની હસતી તસવીર શેર કરતા જ્યોર્જિયા મેલોનીએ લખ્યું કે, પ્રોપેગેન્ડા ફેલાવનારા લોકો અમને સ્થિરતા કે સ્વતંત્રતાના પાઠ ભણાવી શકે નહીં. આ પ્રકારના ખોટા ચિત્રણ અમને અમારો રસ્તો બદલવા માટે મજબૂર કરી શકશે નહીં. તેમણે વધુમાં ઉમેર્યું કે, "અમે બીજા લોકોની જેમ કોઈના ગુલામ નથી, કોઈના માલિક નથી અને કોઈના આદેશોનું પાલન પણ કરતા નથી. અમારો એકમાત્ર માર્ગદર્શક સિદ્ધાંત ઇટાલીનું હિત છે અને વિરોધીઓની નારાજગી હોવા છતાં અમે ગર્વ સાથે આ માર્ગ પર ચાલતા રહીશું."

વેસ્ટર્ન લુકમાં 'દેશી' ટચ:

મેલોનીની આ તસવીરમાં તેમનો પહેરવેશ પ્રોફેશનલ અને અત્યંત આકર્ષક લાગી રહ્યો છે. તેમણે ચારકોલ ગ્રે રંગનું ફોર્મલ બ્લેઝર અને અંદર બેજ (Beige) કલરનું ગોળ ગળાનું સ્વેટર પહેર્યું છે. આ વિન્ટર ફોર્મલ લુકમાં સૌથી વધુ ધ્યાન તેમના કાનના મોટા ઝુમકા ખેંચી રહ્યા છે. આ ઝુમકાઓમાં નીચેની તરફ ઝીણી લટકણ અને નાના ઘૂઘરીઓ લાગેલી છે, જે તેમના પશ્ચિમી પહેરવેશમાં એક સુંદર ફ્યુઝન ટચ ઉમેરી રહ્યા છે. ભારતીય સોશિયલ મીડિયા યૂઝર્સમાં પણ તેમનો આ 'દેશી' અંદાજ લોકપ્રિય થઈ રહ્યો છે.

ચર્ચામાં કેમ છે આ પોસ્ટ?

રાજકીય વિશ્લેષકોનું માનવું છે કે મેલોનીએ આ પોસ્ટ દ્વારા તે ટીકાકારોને નિશાન બનાવ્યા છે જેઓ ઇટાલીની વિદેશ નીતિ કે આંતરિક બાબતોમાં દખલ કરવાનો પ્રયાસ કરે છે. પોતાની વાત મક્કમતાથી રાખવાની સાથે આ પ્રકારે ગ્લેમરસ અને આત્મવિશ્વાસથી ભરપૂર તસવીર શેર કરીને મેલોનીએ ફરી એકવાર સાબિત કર્યું છે કે તેઓ પોતાની મરજી અને દેશના હિત મુજબ જ નિર્ણયો લેવામાં માને છે. સોશિયલ મીડિયા પર આ તસવીર વાયરલ થતા લોકો તેમના લુક અને કેપ્શન બંનેના વખાણ કરી રહ્યા છે.