નવી દિલ્હી :   વડાપ્રધાન નરેન્દ્ર મોદીએ રવિવારે વિડીયો કોન્ફરન્સિંગ દ્વારા 'ડેવલપિંગ વાઇબ્રન્ટ વિલેજ પ્રોગ્રામ ૨૦૨૬'ના સહભાગીઓ સાથે અત્યંત ઉત્સાહસભર માહોલમાં સીધો સંવાદ સાધ્યો હતો. દેશભરના Gen-Z યુવાનોને સંબોધતા પીએમ મોદીએ ભારપૂર્વક જણાવ્યું હતું કે આપણી સંસ્કૃતિમાં 'સામૂહિકતા' અને સહયોગની સદીઓ જૂની પરંપરા રહી છે. તેમણે આ પ્રસંગે 'માય ભારત' પ્લેટફોર્મની પ્રશંસા કરતાં કહ્યું હતું કે દેશના લાખો યુવાનો આજે વર્ચ્યુઅલ દુનિયાની બહાર નીકળીને જમીની વાસ્તવિકતા અને ભારતની આત્મા સમા ગામડાઓને નજીકથી સમજવાનો પ્રશંસનીય પ્રયાસ કરી રહ્યા છે.

આ સંવાદ દરમિયાન Gen-Z પ્રતિનિધિ દિવ્યાંશુ જોશીએ વડાપ્રધાનને ખાતરી આપતા નવી પેઢી માટે 'Gen-Z'ની એક નવી જ રાષ્ટ્રવાદી વ્યાખ્યા રજૂ કરી હતી. તેમણે કહ્યું કે યુવાનો માટે Gen-Z નો અર્થ 'રાષ્ટ્ર પ્રથમ' , ચારિત્ર્ય નિર્માણ, નવીનતા  અને સેવાનો પર્યાય છે. સરહદી ગામડાઓની મુલાકાત લઈ સ્થાનિક લોકોના જીવન અને આકાંક્ષાઓનો પ્રત્યક્ષ અનુભવ કરનાર આ યુવાનોએ વડાપ્રધાન મોદીને વચન આપ્યું હતું કે તેઓ વિકસિત ભારતનું સપનું પૂરું કરવા માટે સંપૂર્ણપણે સમર્પિત રહેશે અને ટૂંક સમયમાં જ પોતાના અનુભવોનો એક વિસ્તૃત અહેવાલ સરકારને સોંપશે.

નોંધનીય છે કે, 'માય ભારત' દ્વારા અમલીકૃત આ 'વિકસિત ગામડા કાર્યક્રમ ૨૦૨૬' અંતર્ગત લદ્દાખ, હિમાચલ પ્રદેશ અને ઉત્તરાખંડના ૭૪ જેટલા અતિ દુર્ગમ અને વ્યૂહાત્મક સરહદી ગામડાઓમાં યુવાનોને મોકલવામાં આવ્યા હતા. ૩ લાખથી વધુ યુવાનોમાંથી પસંદ કરાયેલા ૪૦૦થી વધુ પ્રતિનિધિઓએ આ વિસ્તારોમાં સ્વચ્છતા અભિયાન, પંચાયત મોડેલ અને સ્થાનિક સંસ્કૃતિના જતન અંગે સફળ પ્રયોગો કર્યા હતા. દેશના સરહદી ગામડાઓને 'છેલ્લા ગામડાઓ' નહીં પણ 'પ્રથમ ગામડાઓ' ગણીને તેમનો સર્વાંગી વિકાસ કરવાની પીએમ મોદીની વિઝનરી નીતિને યુવાનોએ નવી ઉર્જા પૂરી પાડી છે.