બેંગલુરુ : આજકાલના અનિશ્ચિત આઈટી જોબ માર્કેટમાં ગમે ત્યારે નોકરી જવાનો ભય કર્મચારીઓને સતાવી રહ્યો છે. આવી જ એક સ્થિતિમાં એક ટેકીએ શેર કરેલી વાર્તાએ સોશિયલ મીડિયા પર ધૂમ મચાવી દીધી છે. સામાન્ય કામગીરીની સમીક્ષા (Appraisal) મીટિંગમાં ગયેલા આ કર્મચારીને જ્યારે મેનેજરે કહ્યું કે કંપનીમાં અત્યારે કોઈ પ્રોજેક્ટ નથી અને તેણે બહાર બીજી નોકરી શોધવી જોઈએ, ત્યારે આખી સ્થિતિ અત્યંત ગંભીર બની ગઈ હતી. મેનેજરે તો ત્યાં સુધી કહી દીધું હતું કે કામ વિના અહીં બેસી રહેવું એ તમારી પ્રતિભાનો બગાડ છે.
પરંતુ આ સમયે ડરી જવાને બદલે, પેલા કર્મચારીએ હિંમતથી એક જુગાર રમ્યો. તેણે તરત જ કંપનીની વેબસાઈટમાં 'આર્ટિફિશિયલ ઇન્ટેલિજન્સ' (AI) ને કેવી રીતે એકીકૃત કરી શકાય અને તેના દ્વારા બિઝનેસ કેવી રીતે વધારી શકાય તે વિશેના પોતાના મૌલિક વિચારો મેનેજર સમક્ષ રજૂ કર્યા. આ એક જ પ્રસ્તાવ મીટિંગના માહોલને સંપૂર્ણપણે બદલવા માટે પૂરતો હતો. કર્મચારીની દૂરંદેશી જોઈને મેનેજર એટલા પ્રભાવિત થયા કે તેમણે બેઠક અટકાવી અને થોડીવાર પછી ફરીથી ચર્ચા કરવા માટે પાછા બોલાવ્યા.
આ બીજી મુલાકાતમાં ચર્ચાનો વિષય બદલાઈ ગયો હતો. મેનેજરે કર્મચારીને પ્રસ્તાવ મૂક્યો કે જો તે આવતા બે મહિનામાં તેના AI આઈડિયાઝને સફળતાપૂર્વક સાબિત કરી બતાવે, તો માત્ર તેની નોકરી જ બચશે નહીં, પરંતુ તેને પ્રમોશન અને આકર્ષક પગાર વધારો પણ મળી શકે છે. જોકે, કર્મચારીએ સ્વીકાર્યું કે તે છેલ્લા ત્રણ મહિનાથી નવી નોકરી શોધી રહ્યો હતો, પરંતુ સફળતા ન મળતા આ એક છેલ્લો પ્રયાસ કર્યો હતો જે કામ કરી ગયો.
આ વાયરલ પોસ્ટ પર સોશિયલ મીડિયા યુઝર્સ પણ બે ભાગમાં વહેંચાઈ ગયા છે. એક તરફ ઘણા લોકો આ કર્મચારીની હાજરજવાબીના વખાણ કરી રહ્યા છે અને તેને "જોબ માર્કેટમાં ટકી રહેવાની શ્રેષ્ઠ કળા" ગણાવી રહ્યા છે. તો બીજી તરફ, કેટલાક અનુભવી લોકોએ કર્મચારીને સાવધ રહેવાની સલાહ પણ આપી છે. એક યુઝરે તો ત્યાં સુધી ટિપ્પણી કરી કે, "આ જોબ માર્કેટ એટલું વિચિત્ર બની ગયું છે કે કંપનીઓ હવે પરફોર્મન્સ રિવ્યુ મીટિંગમાં 'ઇન્ડિયાઝ ગોટ ટેલેન્ટ' રમી રહી છે!" સાવધાન કરનારા અન્ય એક યુઝરે કહ્યું કે, ફક્ત વાતો પર વિશ્વાસ ન કરતા, લેખિતમાં ખાતરી મેળવવી જરૂરી છે. આ ઘટનાએ સાબિત કર્યું છે કે આજના સમયમાં ટેકનોલોજીનું જ્ઞાન ક્યારેક તમારી નોકરી જ નહીં, કરિયર પણ બચાવી શકે છે.