બેરૂત: એક તરફ પાકિસ્તાનની રાજધાની ઈસ્લામાબાદમાં અમેરિકા અને ઈરાન વચ્ચે શાંતિ સ્થાપવા માટે મંત્રણા ચાલી રહી છે, ત્યારે બીજી તરફ ઈઝરાયલે લેબનોનમાં હિઝબુલ્લાહની કમર તોડવા માટે અત્યાર સુધીનો સૌથી મોટો હુમલો કર્યો છે. છેલ્લા ૨૪ કલાકમાં ઈઝરાયલી વાયુસેનાએ દક્ષિણ લેબનોનમાં ૨૦૦થી વધુ લક્ષ્યો પર વિનાશ વેર્યો છે, જેમાં આતંકવાદી સંગઠનના શસ્ત્ર ભંડાર અને કમાન્ડ સેન્ટરોનો સમાવેશ થાય છે.
ભીષણ હવાઈ હુમલા અને જમીની કાર્યવાહી
ઈઝરાયલી સૈન્ય (IDF) ના જણાવ્યા અનુસાર, તેમના લડાકુ વિમાનોએ નબાતીહ શહેર સહિત દક્ષિણ લેબનોનના અનેક વિસ્તારોમાં ઈરાન સમર્થિત હિઝબુલ્લાહના માળખાને નિશાન બનાવ્યા છે. આ હુમલામાં ૧૩ લેબનોની સુરક્ષા દળોના મોત થયા હોવાના અહેવાલ છે. ઈઝરાયલી ભૂમિ દળો પણ દક્ષિણ લેબનોનમાં ઘૂસીને સીધું ઓપરેશન ચલાવી રહ્યા છે. આક્રમણ એટલું તેજ છે કે અનેક સરકારી ઈમારતો પણ તેની ઝપેટમાં આવી ગઈ છે.
હિઝબુલ્લાહનો વળતો પ્રહાર
ઈઝરાયલી આક્રમણના જવાબમાં હિઝબુલ્લાહે પણ હિંમત હારી નથી. સંગઠને દાવો કર્યો છે કે તેમણે ઈઝરાયલના બંદર શહેર અશ્દોદમાં આવેલા નૌકાદળના બેઝને નિશાન બનાવ્યું છે. દિવસભર ઈઝરાયલના સરહદી વિસ્તારોમાં ડ્રોન અને રોકેટ હુમલાના સાયરન વાગતા રહ્યા હતા. જોકે, ઈઝરાયલી ડિફેન્સ સિસ્ટમને કારણે કોઈ મોટી જાનહાનિ થઈ નથી, પરંતુ તણાવ ચરમસીમાએ છે.
સીધી મંત્રણા પૂર્વે શક્તિ પ્રદર્શન?
આશ્ચર્યજનક વાત એ છે કે, લેબનોનના રાષ્ટ્રપતિ જોસેફ આઉને આગામી મંગળવારથી ઈઝરાયલ સાથે સીધી વાતચીત શરૂ થવાની જાહેરાત કરી છે. ઈઝરાયલે પણ આ પ્રસ્તાવને મંજૂરી આપી દીધી છે. પરંતુ આ મંત્રણા ટેબલ પર શરૂ થાય તે પહેલા બંને પક્ષો યુદ્ધના મેદાનમાં પોતાની પકડ મજબૂત કરવા માંગતા હોય તેવું જણાય છે. હિઝબુલ્લાહે અત્યાર સુધી આ સીધી વાતચીતનો વિરોધ કર્યો છે, જેને કારણે મંત્રણાની સફળતા પર શંકાના વાદળો મંડરાઈ રહ્યા છે.
માનવીય સંકટ અને વિનાશ
છેલ્લા ૪૦ દિવસથી ચાલી રહેલા આ લોહિયાળ જંગમાં લેબનોનમાં ૧,૯૦૦ થી વધુ લોકોએ જીવ ગુમાવ્યા છે, જ્યારે ૧૦ લાખથી વધુ લોકો પોતાના ઘર છોડીને વિસ્થાપિત થયા છે. ઈરાન એક તરફ મંત્રણામાં હુમલા રોકવાની શરત મૂકી રહ્યું છે, ત્યારે ઈઝરાયલ કોઈ પણ સમજૂતી પહેલા હિઝબુલ્લાહને સદંતર નબળું પાડી દેવા માંગે છે.
આગામી અઠવાડિયું મધ્ય-પૂર્વના ભવિષ્ય માટે નિર્ણાયક સાબિત થશે, જેમાં કાં તો શાંતિના દ્વાર ખુલશે અથવા યુદ્ધ વધુ ભયાનક સ્વરૂપ ધારણ કરશે.