ચેન્નાઈ : સાઉથ સિનેમાના જાણીતા અભિનેતા ધનુષે પોતાના ચાહક સંગઠનને સામાજિક કલ્યાણ સંગઠનમાં રૂપાંતરિત કર્યા બાદ ચેન્નાઈની એક પ્રતિષ્ઠિત કોલેજમાં એક મસમોટા કાર્યક્રમનું આયોજન કરતાં તમિલનાડુના રાજકારણમાં ભારે ચર્ચા જાગી છે. જોકે તેમણે રાજકારણમાં પ્રવેશ અંગે કોઈ ઔપચારિક જાહેરાત કરી નથી, પરંતુ અભિનેતા થાલાપથિ વિજય રાજકારણી બનીને ચૂંટણી મેદાનમાં ઉતર્યા ત્યારથી તમિલનાડુનું રાજકીય ચિત્ર નાટકીય રીતે બદલાયું છે, અને હવે ધનુષે પણ રાજકારણમાં પ્રવેશવાના સીધા સંકેતો આપ્યા છે. ચેન્નાઈની સેમ્મનજેરી જેપ્પીયર કોલેજ કેમ્પસમાં આયોજિત બેઠક પહેલાં જ વિવિધ જિલ્લાઓથી આવેલી મહિલા ટીમોના સંચાલકો દ્વારા "આપણા પ્રિય ભાઈ ધનુષ, આપણો નેતા" જેવા નારા લખેલા મોટા બેનરો લગાવીને વાતાવરણ ગરમ કરી દેવામાં આવ્યું હતું. ધનુષે પોતાના ચાહક મંડળનું સત્તાવાર નામ બદલીને ‘ધનુષ નરપાણી ઇયક્કમ’ (ધનુષ કલ્યાણ ચળવળ) રાખ્યું છે.

રવિવારે સવારે આયોજિત આ કાર્યક્રમ માટે અભિનેતા ધનુષ ખુદ પહોંચ્યા હતા, જ્યાં આશરે 3,000 લોકોની ક્ષમતા ધરાવતા હોલમાં તમિલનાડુના ખૂણે-ખૂણેથી આવેલા અંદાજે 3,000 થી 5,000 જેટલા મહિલા સંગઠન સંચાલકો અને સભ્યોએ ઉત્સાહભેર ભાગ લીધો હતો. આ ભવ્ય કાર્યક્રમ દરમિયાન અભિનેતા ધનુષે ઉપસ્થિત તમામ મહિલા કાર્યકરો સાથે વ્યક્તિગત ફોટોગ્રાફી કરી તેમને વિવિધ ભેટ-સોગાદો આપી પ્રોત્સાહિત કર્યા હતા. ધનુષે માત્ર ચેરિટી ચળવળ શરૂ કરી નથી પરંતુ તમિલનાડુના વિવિધ વિધાનસભા મતવિસ્તારોમાં સંચાલકોની વિધિવત નિમણૂક કરીને પોતાના સંગઠનાત્મક માળખાને જમીની સ્તરે મજબૂત બનાવવાનું કામ શરૂ કરી દીધું છે, જેનાથી વિજયની જેમ તેઓ પણ આગળ જતાં તેને સત્તાવાર રાજકીય પક્ષમાં બદલશે કે કેમ તે અંગે અટકળો તેજ બની છે.

અહેવાલો મુજબ ધનુષ છેલ્લા કેટલાક દિવસોથી દિલ્હીમાં દેશના અગ્રણી નેતાઓ સાથે સતત સંપર્કમાં છે અને એવી પ્રબળ શક્યતા સેવાઈ રહી છે કે તેઓ 2028 પછી તમિલનાડુના રાજકીય મેદાનમાં સક્રિયપણે ઝંપલાવી શકે છે. તમિલનાડુમાં એમ. જી. રામચંદ્રન, જયલલિતા, એમ. કરુણાનિધિ અને સી.એન. અન્નાદુરાઈ જેવા સુપરસ્ટાર અને પટકથા લેખકો શાસનના શિખરે રહ્યા હોવાથી સિનેમા હંમેશા રાજકારણનો મુખ્ય આધાર રહ્યો છે. બીજી તરફ, થાલાપથિ વિજયની પાર્ટી 'ટીવીકે' ના પ્રવક્તાએ પણ ધનુષના આ પગલાને પ્રેરણાદાયી ગણાવી સ્વાગત કર્યું છે, પરંતુ નિષ્ણાતોનું માનવું છે કે વિજયના નેટવર્ક સામે ધનુષ માટે રાતોરાત લોકપ્રિયતા મેળવવી સરળ રહેશે નહીં.

દ્રવિડિયન રાજકારણમાં ફિલ્મ સ્ટાર્સના પ્રવેશનો દાયકાઓ જૂનો ઇતિહાસ રહ્યો છે, પરંતુ માત્ર સ્ટારડમ રાજકીય સફળતાની ગેરંટી આપતું નથી તે હકીકત છે. હાલમાં ધનુષ દ્વારા તમિલનાડુના તમામ ક્ષેત્રોમાં સંગઠનનો પાયો નાખવામાં આવી રહ્યો છે. આગામી દિવસોમાં ‘ધનુષ કલ્યાણ ચળવળ’ દ્વારા હાથ ધરાનારા સામાજિક કાર્યો અને વહીવટી નિમણૂકો બાદ ધનુષ પોતાની રાજકીય પાર્ટીની જાહેરાત કરે છે કે સામાજિક મંચ તરીકે કામ ચાલુ રાખે છે તે જોવું રસપ્રદ બની રહેશે.