તેહરાન:  ઈરાનના ઇસ્લામિક રિવોલ્યુશનરી ગાર્ડ કોર્પ્સ એ હોર્મુઝ સ્ટ્રેટમાં 'સ્માર્ટ દરિયાઈ નિયંત્રણ ક્ષેત્ર'ની જાહેરાત કરીને ટ્રમ્પ વહીવટીતંત્ર સામે મોરચો ખોલ્યો છે. આ નવી નિયંત્રણ રેખા ઈરાનના માઉન્ટ મુબારકથી UAE ના ફુજૈરાહ અને કેશ્મ ટાપુથી ઉમ્મ અલ-ક્વેઈન સુધી ફેલાયેલી છે. આ હિલચાલથી વિશ્વના સૌથી મહત્વપૂર્ણ તેલ પરિવહન માર્ગ પર ઈરાનનું વર્ચસ્વ વધશે, જે સીધો અમેરિકાના વ્યૂહાત્મક હિતો પર પ્રહાર ગણાય છે.

રાજદ્વારી મોરચે, ઈરાનના વિદેશ મંત્રાલયે પુષ્ટિ કરી છે કે તેમને પાકિસ્તાન દ્વારા અમેરિકાનો એક ગુપ્ત પ્રસ્તાવ મળ્યો છે. પ્રવક્તા ઇસ્માઇલ બાઘાઈના જણાવ્યા અનુસાર, અધિકારીઓ હાલમાં આ દરખાસ્તની ગંભીરતાથી સમીક્ષા કરી રહ્યા છે. જોકે, ઈરાને પરમાણુ કાર્યક્રમ અંગેની વાટાઘાટોને અટકળો ગણાવી નકારી કાઢી છે અને ભારપૂર્વક કહ્યું છે કે અત્યારે તેમની પ્રાથમિકતા માત્ર યુદ્ધને સંપૂર્ણપણે અટકાવવાની છે.

હોર્મુઝની આ નવી વ્યૂહાત્મક રેખા અને અમેરિકા સાથેની પડદા પાછળની વાતચીત એવા સમયે થઈ રહી છે જ્યારે પ્રદેશમાં તણાવ ચરમસીમા પર છે. ઈરાને સ્પષ્ટ કર્યું છે કે 'આગળનો રસ્તો' હજુ નક્કી નથી, પરંતુ તેઓ કોઈપણ પરિસ્થિતિનો સામનો કરવા તૈયાર છે. આ આંતરરાષ્ટ્રીય જળસીમામાં ઈરાનની નવી મર્યાદાઓ વૈશ્વિક બજાર અને યુએસ-ઈરાન સંબંધોમાં કેવો વળાંક લાવશે તે જોવું રસપ્રદ રહેશે.