મોસ્કો, તા. ૬ : અમેરિકા અને ઈરાન વચ્ચે ચાલી રહેલા તણાવ વચ્ચે રશિયાના રાષ્ટ્રપતિ વ્લાદિમીર પુતિને ગુરુવારે ઈરાનની સર્વોચ્ચ રાષ્ટ્રીય સુરક્ષા પરિષદના સચિવ મોહસિન રેઝાઈ સાથે ક્રેમલિનમાં મહત્વપૂર્ણ બેઠક યોજી હતી. રેઝાઈએ ઈરાનના સર્વોચ્ચ નેતા આયાતુલ્લા મોજતબા ખામેનેઈનો ખાસ સંદેશો પુતિનને પહોંચાડ્યો હતો. બંને વચ્ચે યુદ્ધ પછીની સુરક્ષા વ્યવસ્થા, રાજદ્વારી પ્રયાસો અને ઊર્જા સહકાર અંગે ચર્ચા થઈ હતી. 

પશ્ચિમ એશિયામાં યુદ્ધ અને અસ્થિરતાના માહોલ વચ્ચે રશિયા અને ઈરાન વચ્ચે ઉચ્ચસ્તરીય રાજદ્વારી હલચલ તેજ બની છે. ઈરાનના વરિષ્ઠ સુરક્ષા અધિકારી મોહસિન રેઝાઈએ ગુરુવારે રશિયાના રાષ્ટ્રપતિ વ્લાદિમીર પુતિન સાથે મોસ્કોના ક્રેમલિનમાં મુલાકાત કરી હતી. રશિયન રાષ્ટ્રપતિ કાર્યાલયે પણ આ મુલાકાતની પુષ્ટિ કરી છે.

બેઠક બાદ રેઝાઈએ જણાવ્યું હતું કે બંને નેતાઓ વચ્ચે પશ્ચિમ એશિયાની સુરક્ષા, યુદ્ધ પછીની પરિસ્થિતિ અને શાંતિ સ્થાપવાના પ્રયાસો અંગે મહત્વપૂર્ણ ચર્ચા થઈ હતી. ખામેનેઈએ પુતિનને મોકલેલા સંદેશાની સંપૂર્ણ વિગતો જાહેર કરવામાં આવી નથી.

રેઝાઈએ સ્પષ્ટ કર્યું હતું કે ઈરાને અમેરિકા સમક્ષ સાત શરતો મૂકી છે. આ શરતો પૂર્ણ નહીં થાય ત્યાં સુધી ઈરાન હોર્મુઝની સામુદ્રધુની ફરી ખોલવા કે અમેરિકા સાથે વાટાઘાટો શરૂ કરવા તૈયાર નથી.

ઈરાન પરના આર્થિક પ્રતિબંધો, અમેરિકાની નૌકાબંધી, પરમાણુ કાર્યક્રમ અને યુદ્ધવિરામ અંગે બંને દેશો વચ્ચે ગંભીર મતભેદો યથાવત્ છે.

આ બેઠકમાં રશિયાથી ઈરાન સુધી ગેસ પાઇપલાઇન નાખવાની યોજના અંગે પણ ચર્ચા થઈ હતી. તેનો હેતુ ઈરાનની ગેસની અછત ઘટાડવાનો અને પડોશી દેશોમાં ગેસ પુરવઠાની સંભાવના વિકસાવવાનો છે.

અમેરિકા અને ઈરાન વચ્ચે સમાધાનના પ્રયાસો ચાલી રહ્યા છે ત્યારે પુતિન સાથેની આ બેઠકને રાજદ્વારી દૃષ્ટિએ મહત્વપૂર્ણ માનવામાં આવી રહી છે. જોકે કોઈ નવા સૈન્ય કરાર કે સંયુક્ત લશ્કરી કાર્યવાહીની જાહેરાત કરવામાં આવી નથી.